16 Oct 2020 05:20

inkhel

Arsenal-in Pau Torres lak luh an rilruk

Arsenal chuan kum thar January thlaa transfer window a inhawn hunah Villarreal atangin Pau Torres lak luh an rilruk.

Spanish centre-back Pau Torres hi Manchester United chuan an thlithlai ngun hle a, kum thar January thlaa transfer window inhawn hunah Red Devils an chet hma hian Arsenal chuan lak luh ngei an duh a ni.

Villarreal defender Pau Torres hian Arsenal boss hlui Unai Emery kaihhruaina hnuaiah a khel mek a. Gunners boss Mikel Arteta leh technical director Edu te chuan tlar hnung thawm thatna atan Torres hi lak luh ngei an duh a, £35 million an sen erawh a ngai ang.

November 2019 ah Arsenal chuan Unai Emery an ban a, kumin July thla atang khan Villarreal hi a enkawl tan a, kum thum chhung atan thuthlung an ziak a ni.

Pau Torres chungchangah hian Arsenal leh Manchester United te chuan hma lak an tum ve ve avangin che hmasa zawk nih ngei an tum hmel a. Kum 23-a upa Torres hian Spain tan Nations League a Switzerland leh Ukraine an hmachhawn tumin minute 90 chu a khel ve a ni.

Season liam taah khan Torres hi Villarreal tan game 34 ah a inlan a. Villarreal youth team atangin bul a tan a, 2018-19 season chhung khan loan-in Segunda Division club Malaga chu a zawm a, season liam ta atang khan senior team lamah a tel chho ve tan a ni.

Nikum November thla tawp lamah khan thuthlung a ziak thar a, 2024 thleng Villarreal tan hian contract a nei a. November thlaah vek hian Spain tan a inkhel ve tan a, tun thlengin an ram aiawh hian vawi 5 chu a feh chhuak ve tawh a, Luis Enrique kaihhruaina hnuaiah captain Sergio Ramos nen an ding dun ve thin a ni.

Gunners hian Emirates Stadium-ah tlar hnung tih phui theih dan kawng an dap chhunzawm zel a. Arteta chuan Flamengo atangin Pablo Mari a la lut tawh a, David Luiz chuan kum khat chhung atan contract a pawt sei bawk a, sawisel erawh a hlawh hle.

English defender Rob Holding chu tun season kal mekah a chhawr chho zel a, William Saliba, Calum Chambers, Shkodran Mustafi leh Sokratis Papastathopoulos te chu duh thlan theih a la nei bawk a ni.