Napoli striker Victor Osimhen duhtu zingah Arsenal an tel ve ta nge nge a, CalcioNapoli 24-in a tarlan dan chuan Arsenal hian Osimhen dawr tur hian chet an la tawh a ni.

Mikel Arteta leh a hote chuan Osimhen hi an dawr tan tawh niin English media te pawhin an tarlang bawk a, Arsenal hian sum lamah harsatna lian em em an nei lo a, nipui bazar inhawn hun chu Osimhen hian club thar a nei ngei dawn niin a lang.

Kum 25 mi Nigerian striker hi Europe club lian, PSG, Chelsea leh Real Madrid te pawhin an hel reng nia report a ni a, a man tur erawh a sang deuh dawn.

Napoli president Aurelio De Laurentiis chuan an striker Osimhen chu tun season tawp ruala a chhuah tur thu a sawi niin The Sun-in a tarlang. 

Kum 30 lai Serie A title an lak tawh loh hnuah Osimhen leh a hoten Napoli chu trophy an chawipui a nih kha. Nikum nipui bazar inhawn lai khan Osimhen hian Napoli a chhuahsan dawn niin thu a thang nasa.

Mahse kum 25 mi hian thla hmasa khan Naples-ah contract thar a ziak a, hei hian a man pawh a tihto phah dawn ta a ni.

Contract thar ziak mah se Osimhen hi Napoli-ah a nghet tihna a ni chuang lo a, a contract tharah khan release clause £112m lai ziah tel a nih thu The Sun chuan a tarlang.

Tun season tawp hunah Napoli hi an Osimhen hi an hralh a nih chuan, a man a to dawn khawp mai. An president Aurelio De Laurentiis pawhin a chhuak a nih chuan Real Madrid emaw English club lian eng emaw ber a pan a rin thu a sawi tel bawk.