Arsenal in North London an hnawih sen

03rd December 2018, 03:12AM

Arsenal chuan Emirates Stadium-ah an hmelma kumhlun Tottenham Hotspur an mikhual a, North London Derby 183-naah hian goal 6 ngawt mai a lut a, mual neitu Arsenal chu 4-2 in an chak a ni.

Unai Emery chuan Premier League game an khelh hnuhnun bera 2-1 a Bournemouth an hneh tuma a khelhtir ang deuh chiahin Arsenal chu a rem a. Spaniard coach hian Alexandre Lacazette chu squad-ah a dah tel ve leh tawh a, hetih lai hian Mesut Ozil erawh a hnung na avangin a lang lo thung.

Tottenham tan September hnua a vawi khatna atan Jan Vertonghen chuan bul a tan ve a, Toby Alderweireld dinnaah a ding a, Juan Foyth chuan tlar hnungah hmun a chang ve bawk a. Premier League game an khelh hnuhnun berah diamond system hmangin Chelsea an hneh thei a, Arsenal tlar hnung chhaih buai turin Son Heung-min leh Harry Kane te an ding dun a ni.

Arsenal (3-4-3): Bernd Leno; Shkodran Mustafi, Sokratis Papastathopoulos, Rob Holding; Hector Bellerin, Lucas Torreira, Granit Xhaka, Sead Kolasinac; Henrikh Mkhitaryan, Pieree-Emerick Aubameyang, Alex Iwobi

Subs: Petr Cech, Mohamed Elneny, Aaron Ramsey, Alexandre Lacazette, Stephan Lichtsteiner, Ainsley Maitland-Niles, Matteo Guendouzi

Tottenham (4-1-2-1-2): Hugo Lloris; Serge Aurier, Juan Foyth, Jan Vertonghen, Ben Davies; Eric Dier; Moussa Sissoko, Dele Alli; Christian Eriksen; Son Heung-min, Harry Kane

Subs: Danny Rose, Toby Alderweireld, Harry Winks, Kyle Walker-Peters, Fernando Llorente, Paulo Gazzaniga, Lucas Moura

Spurs hi an chak a nih chuan hun rei vak lo chhung chu pathumnaah an chho ve leh thei dawn a, Liverpool nen point 33 an hmu dun thei dawn a. Inelna hrang hrangah a zawnin vawi 6 an chak tawh a, Mauricio Pochettino pawlte chu an hlauhawm hle dawn tih a chiang.

Arsenal hi tun hnaia Tottenham nen an inkhelhah an che chhe zawk a, vawi 8 an intawn hnuhnunah Arsenal hi vawi khat chiah an chak a. He inkhelah hian Arsenal an chak a nih chuan Spurs hi an lehpel ang a, palinaah an awm thei dawn a. Gunners hian Premier League game an khelh hnuhnun 11 ah chak loh an la nei miah lo a, vawi 8 an chak a, vawi 3 an draw a, tun season chhungin game 18 chhung chu hneh loh nei loin an kal tluang mek a ni.

Inkhel tan phat atangin boruak a tang tha nghal hle a, goal thun hmasa zawk nih tumin an innawr tan nghal a. Mual neitu Arsenal chuan hun tha an insiam hmasa a, minute 3 lekah Henrikh Mkhitaryan chuan Spurs goal lamah ball a vawrh phei a, Pierre-Emerick Aubameyang chuan a lo tauh lut lo hlauh a ni.

Minute 9-ah mikhual team tan thil pawi a thleng a, Arsenal in Spurs goal lama ball an vawrh phei chu Jan Vertonghen chuan a kutin a lo khawih fuh a, referee chuan a ham a, Gunners chu penalty a hlawhtir a, Vertonghen chuan yellow card a hlawh thung a.

Penalty pet turin Pierre-Emerick Aubameyang chu a pen chhuak a, a tisual lo chiang hle a, Arsenal chu 1-0 in hma a hruaipui nghal der a. Aubameyang hian goal shot vawi 9 a neihah goal 9 a thun thei a, heti hian tun season chhungin Premier League-a goal thun hnem ber a ni thei chiah bawk a ni.

An khelh chhunzawm leh nghal a, goal a lut zui leh mai rih lo a. Minute 20 vel an khelh hnu chuan Spurs an harh thar zual emaw tih tur a ni a, inkhel an thunun chho tan a. Arsenal chuan a tir lama an nawr chiam ang kha an chhunzawm vak tawh lo a, Spurs chu a nawrtuah an tang ve leh thung a ni.

Minute 30-ah Spurs thawhrimna chu a hlawhtling a, free kick an hlawh a, hei hi Christian Eriksen chuan a pet a. Heta ball kal hi Eric Dier chuan a lo tauh lut a, an si phurh chu a sut a. A goal thun lawm tur hian Arsenal tantute awmna lamah a tlan phei a, han bawr khawm deuh laih a awm phah a, Dier hian yellow card a hmuh phah a ni.

Goal luh hnu lawkah boruak danglam tak a thlen zui leh a. Minute 33-ah Rob Holding chuan Arsenal box chhungah Son Heung-min chu a titlu a, referee Mike Dean chuan Spurs chu penalty a hlawhtir a. Harry Kane chuan penalty hi petin a thun chiang hle a, Spurs chu hma a hruaipui ve thung a ni.

First half chhungin lehlam lehlam hian penalty an hlawh ve ve a, October 2014 a Stoke City leh Swansea City te inkhelh tuma penalty an hlawh ve ve hnuah Premier League game-ah chuan hetiang a thlen leh hmasak ber a ni.

Half time thlengin goal dang a luh belh tawh rih lo a, Arsenal chuan goal thun theihna hun tha an nei a, mahse Hugo Lloris chuan a lo dang thei hlauh a, chawlh lawkah Spurs chuan 2-1 in hma an hruai a ni.

Second half an tan leh a, Unai Emery chuan Alex Iwobi aiah Alexandre Lacazette a luhtir a, Henrikh Mkhitaryan pawh la chhuakin Aaron Ramsey chu a luhtir bawk a. North London Derby bikah Arsenal in half time-a si an phurh hnua an chak leh theih hnuhnun ber chu September 2007 khan niin, hemi tum hian 3-1 in an chak a ni.

Minute 56-ah Arsenal chuan an si phurh an sut ve leh a. Hector Bellerin chuan Aaron Ramsey chu through ball a pe a, hei hi Welshman chuan lain Aubameyang chu a pe ve leh chhawng a. Aubameyang chuan yard 25 atangin mawi zetin a thun a, 2-2 a nih theih phah a.

Tun season chhungin Aubameyang hi Premier League goal 10 thun tling thei hmasa ber a nih bakah goal shot 10 a neih hnuhnungah goal 10 a thun thei a. October 2007 khan Blackburn Rovers forward Benni McCarthy chuan a zawnin goal shot 10 a neihah goal 10 a thun a, Aubameyang hi hetiang ti leh thei hmasa ber a ni.

Minute 74-ah goal a lut leh a, Arsenal chuan goal thunin he inkhela a vawi hnihna atan hma an hruai ve leh thung a. Aaron Ramsey zarah Alexandre Lacazette chuan goal a thun a, Ramsey hian second half-a a luh hnuah mi goal thun tur vawi hnih a siam ta der a, Arsenal chuan 3-2 in hma an hruai theih phah a.

Goal luh hnu lawkah hian Gunners chuan a dang an thun belh leh nghal vat a. Minute 77-ah a hmaa goal hnih lo thun tawh Aubameyang chuan Lucas Torreira chu ball tha deuh mai a pe a, hei hi Torreira chuan a lo thun a, Arsenal chuan 4-2 in hma an hruai ta a ni.

Lucas Torreira hian Arsenal tana Premier League goal a thun hmasak ber a ni a, Arsenal player zingah Tottenham laka Premier League goal hmasa ber thun thei palina niin, a hmain Nicklas Bendtner, Mikael Silvertre leh Per Mertesacker te chuan Arsenal tana Premier League goal hmasa ber chu Spurs lakah hian an lo thun tawh a ni.

Minute 85-ah mikhual team tan thil duhawm lo tak a thlen belh a, Jan Vertonghen chuan Lacazette a tlawh avangin a vawi hnihna atan yellow card a hmuh phah a, hnawhchhuah a nih phah a. Spurs chuan si hnih an phur mek a, mi 10 chauh an ni zui bawk a, an tan beisei a bo tawh hle a. Vertonghen hian Premier League game 195 a khel tawh a, hnawhchhuah a nih vawi khatna a ni.

Hun tawp thlengin goal dang a luh belh tawh lo a, Arsenal chu 4-2 in an chak a. An manager thar Unai Emery chuan North London Derby a hmelhriat hmasak berah Arsenal chu a chakpui thei nghal a ni.

Copyright © inkhel.com 2024. All rights reserved.