​Arsenal-in Lucas Vazquez an dawr dawn

18th October 2019, 06:10AM

Arsenal chuan Real Madrid winger Lucas Vazquez chu dawr an tum tak tak ta niin English chanchubu tam zawk chuan an tarlang.

Arsenal hian Vazquez-a manah hian pound maktaduai 17.3 an thehchhuak dawn niin an sawi a, kum 28 mi hi Zinedine Zidane-a hnuaiah duh angin a khel tam lo hle.

Vazquez hian Vinicius Junior leh Rodygo-te chu a nek chhuak zo tawh meuh lova, duhsak a hlawh lo chho viau bawk nen Real Madrid chhuahsana Arsenal zawm chu a hreh a rinawm lo.

Arsenal hian tun nipui chhung khan Lille atangin Nicolas Pepe chu manto takin an lei a, mahse Pepe hian beisei angin a la khel lova, Gunners boss Unai Emery chuan Vazquez chu an tlar hma thawm that nan lakluh belh a duh niin a lang.

Arsenal hian Vazquez hi lalut duh mahse, awlsam takin an lakluh theih a rinawm lova, kum 28 mi Vazquez hi German club lian Bayern Munich leh Italian club AS Roma-te chuan an duh ve bawk niin chanchinbu thenkhat chuan an ziak.

Roma leh Bayern –te hian Vazquez hi an dawr tan tawh niin tarlan a ni a, player-in hlawh a phut zat pawh club hnihte hian an pe hreh lo ve ve niin sawi a nih bawk avangin Arsenal tan muanchan chi a ni dawn lo.

Vazquez hi Real academy chhuak a ni a, tuna a contract-ah hian thla 18 bak a nei tawh lova, Real pawh hian an lungawina tawka dawrtu an hmuh chuan Spainish winger hi an chhuah tir mai a rinawm tawh a ni.

Copyright © inkhel.com 2024. All rights reserved.