Arsenal chuan Viktor Gyokeres an la lut dawn ta nge nge niin a lang a, inbiakna chuan a vawrtawp a thleng mek a, Sporting CP leh Arsenal te hi a thuphungin an inrem ta niin The Athletic chuan a tarlang.

Club pahnih te hi €63.5million (£54.8m, $74.2m) bakah add-ons €10m (£8.6m, $11.7m) in an inrem iin The Athletic chuan a tarlang a ni.

Arsenal khan €60m bakah add-ons €10m khan an dawr a, mahse Sporting CP President Frederico Varandas khan a pawm mai thei lo. Hei vang hian inbiakna chhunzawm zel a ni a, Arsenal chu tlemin an han inhuam tam leh hret a, tunah chuan inremna an nei ta nia tarlan a ni.

Gyokeres hian Sporting-ah training a zawm duh lo a, Arsenal pan a duh avangin a nuar. Hei vang hian Sporting chuan pawisa an chawitir dawn a, mahse Arsenal lam hi a pan dawn ta nge nge niin a lang.

Gyokeres hi Arsenal-in an la lut a nih chuan, tun nipui bazara Arsenal player lak luh 4-na a ni dawn. Mikel Arteta chuan midfielders Martin Zubimendi leh Christian Norgaard a la lut tawh a, goalkeeper Kepa Arrizabalanga chu Chelsea atangin a la lut tawh bawk.

Arsenal hian number 9 mumal tak an nei lo. Kai Havertz leh Gabriel Jesus te season hmasa tir lamah khan an han chhawr a, a hnu lamah Mikel Merino chu an hmang leh. Gyokeres an nei thei a nih chuan team hlauhawm tak an ni dawn chiang a ni.