Arsenal chuan nipui transfer window inhawn hunah Ever Banega chu biak an tum niin an sawi.
Unai Emery chuan Juventus lam pan tur Aaron Ramsey hmun ruak hnawh khat turin Sevilla midfielder Ever Banega chu a duh a. Emery hian squad thawm that hna chu muangchanga thawh chhoh zel a rilruk a, tun atangin ruahmanna a siam chho tan a. Midfield tiphuisui tur hian Banega chu a dah lian hmasa ta ber a ni.
Emery chuan Spanish club pahnih a enkawl laiin Argentine midfielder Ever Banega hi a lo hrual tawh thin a. Sevilla leh Valencia ah te anni pahnih hi an lo inhrawn tawh a, Emery-a’n Sevilla a enkawl laiin Banega hian mi hriat a hlawh chho tan chiah a ni.
Box to box midfielder Banega hi season hnih chhung chu Sevilla tana player pawimawh ber pawl a ni chho a, European title pawh vawi hnih ngawt a lakpui hman a. 2016 khan Unai Emery chuan Paris Saint-Germain a enkawl a, Banega pawhin Spain chhuahsanin Italy lam a pan a, Inter Milan a zawm ve ta bawk a ni.
Inter Milan lamah boruak a nei lian thei vak lo a, hei vang hian nikum khan Banega hian Andalusian club lam hi a pan leh daih a. Tunah hian thla 18 chhung chu Banega hian contract a la nei mek a, Arsenal hian an lei dawn a nih chuan £17 million vel bawr chauhin an lei theih a rinawm a ni.
Spaniard coach Unai Emery chuan Banega hi phone hmangin a bepawp tawh a, North London lama kal tur hian a thlem tan niin an sawi a. Argentine midfielder pawh hian a pu hlui chu Premier League club lama hrawn leh hi a hreh vak hmel loh niin an sawi a, nakinah mumal deuh zawkin an la inbe zui dawn a ni.
Unai Emery hian Ever Banega hi be tan mahse June thla hian kum 31 a tlin tawh dawn avangin hei hian ngaihtuahna a tithui hle a. A kum tlem tawh vak lo mahse Emery chuan Argentine midfielder chuan khelmualah boruak a tidai thei em a, Gunners in an mamawh tak a nih avangin an thatpui viau a rin thu a sawi.
January thlaa transfer window inhawn lai khan Arsenal chuan Ever Banega hi an lo thlithlai tawh a, mahse player leina tur sum an neih tak loh avangin Gunners chuan nipui transfer window inhawn hun an nghah a ngai ta a. January thlaah khan Banega hi loan-a lak tumin hma an la a, mahse Sevilla lamin transfer pangngai lo chuan chhuahtir an phal loh avangin an inrem thei ta lo a. Hetiang a nih avang hian Arsenal chuan Barcelona midfielder Denis Suarez chu loan in an la ta a ni.