14 Mar 2019 08:58

inkhel

Arsenal-in contract ziak tha duh lo an dim dawn lo

Arsenal chuan an player tha tak takte chu contract thar ziahpui theih loh an nei ta fo mai a, a tawpah free transfer in an chhuak nual tawh a. Hetiang hi pumpelh a nih theihna turin club thuneitute chuan an kalphung thlak danglam dan tur an ngaihtuah mek.

Kum kaltaah Arsenal hian an thiampuipa Alexis Sanchez chu loh theih lohin an chhuahtir a, tunah pawh Aaron Ramsey chu free transfer bawkin a chhuak ve leh dawn a. Hetiang deuh hian a hma pawhin player te chelh zui chungchangah harsatna an lo tawk nual tawh bawk a ni.

Hmannia 2-0 a Manchester United an hneh hnu khan Arsenal managing director Vinai Venkatesham leh director of football Raul Sanllehi te chu club director Josh Kroenke hoin an inhmukhawm a, an club inkaihhruai dan tur tha zawk hi an ngaihtuah niin an sawi.

Midfielder chhuanvawr pakhat Aaron Ramsey leh Arsenal chu contract thar chungchanga an inrem theih tak loh avangin season tawp rualin an inthen a ngaih phah a. Ramsey hi Juventus chuan contract an ziahpui vek tawh a, Welsh midfielder hian Italy lamah kar khata £400,000 hlawh turin thuthlung a ziak tawh a ni.

Kum 27-a upa Ramsey chauh hi Arsenal in player lian tham deuh an chelh zui theih loh a ni bik lo a. Kum dangah pawh player tha tak tak an lo chan nual tawh a, Samir Nasri, Bacary Sagna, Robin van Persie, Alex Oxlade-Chamberlain leh Alexis Sanchez te chu hetiang deuh hian loh theih lohin an chhuak hlawm a. Thenkhat hi free transfer a an chhuah laiin, thenkhat chu Arsenal hian man tlawm deuhin an hralh bawk a ni.

German playmaker Mesut Ozil pawh contract chungchangah hian inremna an neihpui thei lawk lo a, mahse club hian a hlawh tihsan an sawipui hnuah contract an ziak thar leh thei a. Khami tum khan inrem thei ta lo se Ozil pawh kha free transfer a chhuak thei tur a ni a, hlawh sang tak hmangin an chelh zui thei hram chauh a ni.

An thil tawn tawh thil an thlir let a, Gunners thuneitute chuan an thil tih thin dan chu thlak danglam thain an hre tawh a. A hmaa an tih thin dan fuh chiah lo te chu thlirhoin, kal dan tha zawk an ngaihtuah zui a. Player induh deuh hlek, inremna an neihpui theih loh enkawl dan tur tha tak an ngaihtuah a, pawisa tam tham tak an hloh loh dan tur an ruahman a ni.

Ngun taka an ngaihtuah hnuah Arsenal player zinga contract nei tlem tawh, a thar ziak tha duh lo deuhte chu kum hnih an la neih lai velin thutlukna siampui an tum thin ang a. An indawr fuh thei meuh lo a nih chuan club hian player te contract zawh hun nghak tawh loin hralh hmiah hmiah tawh ni se tiin an rel.

Arsenal hian nipui transfer window inhawn hunah squad chu siksawi nasat an tum viau niin an sawi a, transfer guru Monchi chu Emirates Stadium-ah an thlem luh tawh an beisei hle bawk a. Spanish sporting director Monchi hian tun thla tirlam khan UEFA Champions League atanga an tlak hnuah AS Roma chu a chhuahsan zui a ni.

Monchi hi a hmain Unai Emery nen pawh an lo inhrawn tawh a, anni hian Sevilla chu a zawnin vawi thum chu Europa League title an lo lakpui tawh a. Tun hnaia thuthang hi a tak a nih chuan North London club hian nipui huna hman tur £40 million vel chauh an nei ve thei dawn a, mahse Monchi an neih chuan hetiang lo deuh hi nei thei tura ngaih an ni.