Arsenal chuan Mesut Ozil chu theh chhuahna tur an ngaihtuah mek niin thu thang a awm mek a, an sawi dan chuan Premier League club hian German playmaker hi Chinese club hausa leh Italian club lian te hnenah kaltir tumin hma lak an tum mek a ni.
Mesut Ozil hi Arsenal player zinga hlawh sang ber niin, kar khatah £350,000 zet mai a hlawh a. Heti taka a hlawh a san lai hian khelmualah erawh beisei a pha lo rei ta viau mai a, hei vang hian Emirates Stadium-ah pawh a tlak nat tawh loh phah a ni.
Arsene Wenger chhuah hnua Unai Emery kaihhruaina hnuaiah phei chuan Ozil hian khelhna hmun pawh a chang ta meuh lo a. Club lampang chuan chhawr tangkai theih mang loh, hlawh sang bawk si kawl reng chu dik theiin an hre lo a, hei vang hian Ozil thehthang theih dan tur hi an ngaihtuah chhoh phah niin a lang.
Ozil hi Arsenal chuan hralh chhuah phal viau mahse a hlawh te a san em avang hian club dangte chuan an lei chak loh phah a. Hetianga harsatna an tawh chhoh takah chuan Emery pawhin Ozil man hi a chhiar sang hran lo niin an sawi.
Nipui transfer window inhawn hunah Unai Emery chu Arsenal thuneitute chuan player leina tur pawisa an pe tam thei dawn lo tih an hrilh tawh a, a tam berah £40 million bak an pek loh tur thu an hrilh chiang tawh a. Heti a nih chuan Mesut Ozil a hralh theih tak leh player leina tur hi a neih belh thei dawn a ni.
January thlaa transfer window inhawn lai pawh khan Arsenal chuan Ozil hi hralh an lo tum tawh a, mahse amah beiseitu an hmuh zawh loh avangin an hralh thei ta lo a. Hlawh sang tak pek reng tho a ngaih avang hian China rama club hausa deuh dawr tur an zawng mek a, Italian club lampang pawh an dap kual mek bawk a ni.
Kum 30-a upa Ozil hian kuminah vawi hnih chiah a la khel ve a, kar tawpa Huddersfield an hneh khan squad ah pawh a tel ve lo a. Nikum January thlaa Manchester United lama Alexis Sanchez a chhuah khan Ozil chuan 2021 thleng daih tur contract a ziak thar a, a hlawh pawh kar khatah £350,000 a nih phah a ni.
Premier League bika Mesut Ozil chet dan:
Goals per match
Arsenal average: 0.19
2018-19 average: 0.21
Assists per match
Arsenal average: 0.32
2018-19 average: 0.07
Passes per match
Arsenal average: 63.22
2018-19 average: 45.07
Shooting accuracy
Arsenal average: 45 per cent
2018-19 average: 50 per cent
Recoveries per match
Arsenal average: 4.30
2018-19 average: 3.35