Arsenal chuan an tlarhnung thawm that nan English defender Ben White chu Brighton atangin an la fela, kum nga daih contract an ziahpui.

Arsenal hian White-a manah hian pound maktaduai 50 lai an seng nia sawi a ni a, kum nga daih contract an ziahpui bakah hian kum khat dangin White-a contract hi pawh sei belh theih a ni dawn a ni.

White hian jersey no.4 a ha dawna, Arsenal hian Brighton inremna an neihpui danah hian, White hi Arsenal-in an hralh hun a la awm a nih chuan a manah Brighton hian chan an nei ve bawk dawn.

Arsenal manager Mikel Arteta chuan White an lakluh chungchang sawiin, “Ben-a hi kan lakluh tum ber zinga mi a ni a, kan la thei ta hi a lawmawm hle a ni. Brighton leh Leeds lamah nasa takin Ben-a hi a inzir tawha, coaching tha tak tak dawngin, Brighton leh Leeds-a a khelh lai te khan player tha a nihzia a lan tir tawh.

“Ben hi defender fing tak, ball pawh thiam thawkhat tak a ni a, kan mamawh tak pawh a ni. A la naupanga, mahse team kan din mekah hian lo tel tur awm tak ni a, hun rei tak chhung kan tlarhnung lama mi pawimawh a nih theih kan beisei a ni,” a ti.

Kum 23 mi White hi tun nipui bazar chhunga Arsenal player lakluh thar pathumna a ni a, a hma in Arsenal hian Nuno Tavares chu Benfica atangin an lalut tawha, Anderlecht atangin Albert Sambi Lokonga pawh an lalut tawh a ni.