Pathianni zan khan Premier League match-ah Liverpool leh Arsenal an inhmachhawn a, Anfield-ah Dominik Szoboszlai-a free kick ropui lutuk chu Liverpool chakna a ni.
Zubimendi chuan goal aṭanga pen 30 velah Curtis Jones a titlu, Liverpool chuan free kick an hlawhchhuak a, he free kick hi kawh mar pawhin Dominik Szoboszlai chuan a pet. Arsenal goal top corner-ah a thlawk lutuk a, Theihtawpin Raya fan mah se, a khawih hman ta lo a ni.
A hma zawngin Premier League hian Nike ball an hmang ṭhin a, kumin hian Premier League leh Nike contract a tawp. Puma ball Orbita Ultimate PL chu an hmang chho ṭan ta a, Arsenal goalkeeper Raya chuan ball thar avanga goal nia ngaih theih turin inkhelh zawhah a sawi.
"Ball thar a ni a, engpawh nise a pet ṭha tak zet. Kan ball thar hi tlema kan la inzir deuh chu a ngai dawn, kan insiamrem a ngai dawn. Save te hi a har khawp a nia. Nike ball nen khan a inang lo lutuk a, kan insiamrem a ngai a ni.
"A thap dan pawh a inang lo a, han pet reng reng pawh hian a danglam zia a lang chiang. Kum tam tak Nike ball kan lo hmang tawh ṭhin a, Puma ball tharah hian kan vaia kan insiamrem a ngai dawn a ni," tiin inkhelh zawhah Raya chuan a sawi.
A hma pawhin Arsenal boss Mikel Arteta chuan an ball thar chungchang hi a lo sawi tawh a, "Theih tawpin kan chul nel ve alawm, kan pet over luah luah a, ball kal dan leh a thlawh dan hi a danglam hle. Chuvang chuan kan inzir nasat a ngai dawn a ni," tiin Arteta chuan a sawi.
Anfield-a inkhel hmuhnawm takah khan chance hlauhawm a tam lem lo a, first half-ah Madueke shot ṭha lutuk chu Alisson chuan a lo dan sak. Madueke leh Kerkez inhmachhawn a hmuhnawm a, Madueke tal na viau mah se, Kerkez khan a lo dang hman deuh zel a ni.
Team hnih ten defender an nei ṭha a, an shot pawh an lo in block sak hman deuh zel. Goalkeeper ve ve ten hna hautak thawh tur an nei meuh lo.
Mual neitu lamin ball possessions 53% an nei a, shots vawi 9 neiin goal zawnah vawi 3 an shot. Arsenal lamin shots vawi 11 an nei a, goal zawnah vawi 1 chiah an pet. Inkhel inbuktawk tak a ni a, goal ropui tak chu result tidanglamtu a ni ta a ni.
Inkhelh ṭan aṭanga minute thumna lekah Arsenal defender Saliba a inhliam. Ani hi warmup an neih laiin a kerek a bilh tawh, match a khelh chhoh theih mai rin a nih laiin, a khel thei ta lo a, engtia rei nge a chawlh dawn tih hriat a ni lo a, Arsenal tan chuan channa nasa tak a ni dawn a ni.
Writz pawh a inhliam niin a lang a, lak chhuah a ni. Inkhelh zawhah Liverpool boss Arne Slot chuan Writz chu a inhliam loh thu leh, inkhelh a ṭan avanga a tihrawl na vel mai mai a nih thu a sawi a ni.