15 Sep 2020 09:24

bakteaJr.

Mizo tlangval

​Arsenal-in Aubameyang an thlung nghet

Arsenal chuan an captain Pierre-Emerick Aubameyang chu hun eng emaw chen contract thar ziahpui an tum hnuah an hlawhtling ta a, kum thum chhung atan an captain hi contract thar an ziahpui.

Tun season zawh rual hian Auba-a contract neih lai hi zo tur niin, chanchinbu mite chuan contract thar a ziak duh lo niin an lo sawi fo tawh thina, mahse Auba hian Gunners tana goal khung zel turin contract thar a ziak ta a ni.

Auba hi Arsenal player pawimawh ber tia sawi ngam a ni a, Arsenal tan Premier League game 86 khel tawhin, goal 55 lai a khung tawha, season liamta pawh khan Premier League-a goal khung hnem ber zinga mi a ni a, goal 22 ngawt a khung.

Kum 31 mi Auba chuan a contract a pawhsei chungchang sawiin, “He club special tak tana contract ziah hi ka tan chuan ngaihtuahna sen nawn a ngai lova, he club-ah hian ka tlangnel em em a, chu chu fans-te, ka teammate te, ka chhungte leh club chhunga mi zawng zawng te vang chauh a ni.

“Arsenal-ah hian rinna ka nghat tlata, eng emaw ropui tak kan hlawhchhuak ho thei tih hi ka pawma, thil phurawm tak hmachhawp kan nei meka, Arsenal tan kawl a eng dawn tih hi ka ring thlap a ni,” a ti.

Arsenal manager Mikel Arteta chuan, “Kan hnenah Pierre-Emerick a awm zel hi kan tan a pawimawh em em a, player tha tak leh fing tak a ni. He club tana goal 50 khung thei rang ber a ni a, chu chu a nihna engkim hi a hril nghalin ka hria.

“Kan team tana leader pawimawh tak a ni a, kan team din mekah a pawimawh hle. Khawvela player tha ber berte huanga awm a duh a, sulhnu ropui tak hnutchhiah a duha, chu chu Arsenal-a a awm lai hian a tih theih ngei ka beisei a ni,” a ti.