11 Jan 2019 03:02

inkhel

​Arsenal-in a nghetin tumah lalut dawn lo

Thlasik bazar hun a inhawnga, club tinten an squad thuamthat dan tur kawng an ngaihtuah mek. Arsenal lam pawh an bang bik lova, tun thlasik bazar hun chhungin player lakluh la nei lo mahse loan tal chuan an lakluh a rinawm hle.

Arsenal manager Unai Emery chuan a ngheta tumah an lakluh theih rih loh thu a sawi a, loan chauhva player thar an lakluh tur thu a sawi. Spanish manager chuan, “January-ah hi chuan tumah an nghetin kan lalut thei tawh rih lo, loan chiahin kan lakluh pawhin a ni ang,” a ti.

Arsenal hian an midfielder Aaron Ramsey chu an chan ngei dawn a, an squad a chhah that loh sa nen Welsh midfielder aiawh tu tur an lakluh ngei a ngai dawn a, Barcelona player Denis Suarez leh Sevilla midfielder Ever Banega-te nen sawi zawm an ni.

Emery hian Sevilla a enkawl laiin Suarez leh Banega-te hi a lo enkawl ve ve tawh a, a hre chiang hle tura ngaih a ni. Anni nena sawizawm a nih chungchangah Emery chuan, “Club hian kan club hmasawn nan loan-a player lakluh tum a nei nual a, hma an la mek a, engkim min hrilh ve zel bawk. Tunah rih chuan thuthar ka nei lo,” a ti.

Emery hian nikum nipui lai khan Arsenal hi a zawm a, player lei nan pound maktaduai 70 chuang a seng tawh. Nipui lai khan Bernd Leno, Stephan Lichtsteiner, Sokratis Papastathopoulas, Lucas Torreira leh Matteo Guendouzi-te lalutin, a ngheta player lakluh chu tun season-a tan an duhtawk tawh niin a lang.