Arsenal supporter-te chuan an manager Unai Emery chu duh khawp lovin chhuak turin duh hle mahse Arsenal hotute lam chuan an manager Emery chu an la thlawp tlata, Spaniard manager hi an la ringtawka ban an tum lo niin a lang.

Arsenal hian an Premier League game hnuhnung 10-ah vawi hnih chiah hnehna an changa, tunah hian paruknaah awmin, top 4 spot hi point 9 laiin an pha tawh lova, supporter-te an lung a awi tawh meuh lo.

Arsenal head of football Raul Sanllehi leh an managing director Vinai Venkatesham-te chuan Arsenal-a an staff 200 chuang vel zet chu Thawhtanni khan meeting an neihpuia, hetah hian Sanllehi leh Venkatesham-te chuan an manager an la thlawp thu hi an sawi.

Sanllehi leh Venkatesham-te chuan an staff-te hnenah an dinhmun leh thil dang hrang hrang sawiin, “Midang zawng zawng ang bawkin tun hnaia kan result neihah kan lung a awi bik lova, kan fan-te tawrh hi kan hriatthiampuia, anni mai bakah Unai leh kan player-te leh kan staff zawng zawngte beisei angin kan awm lo mek tih hi kan pawm.

“Tun season-a kan hmachhawp te a hlawhtlin dawn chuan hma kan sawn a ngai hle a, mahse Unai hi kan mamawh dik tak niin kan ngaia, ani bakah hian backroom staff-te ah pawh rinna kan nghat tlat a ni. A phenah hma kan sawn theih nan theihtawp kan chhuah meka, hma kan sawn leh ngei pawh kan ring.

“Min support-na te hi kan ngaihthah ngai lova, inpumkhat takin kan team kan thlawp zel theih kan inbeiseia, he hun harsa tak kan paltlang mekah hian kan intihchak tawn theuh a ngai a ni,” an ti.

Kum 48 mi Emery hi nikum khan Arsene Wenger thlak tura lakluh a ni a, season liamta khan Emery hnuaiah Arsenal hian Europa League final thlengin league-ah pangana an ni bawk a ni.