Pathianni zan dar 9-ah Manchester City chuan Etihad Stadium-ah Arsenal an mikhual dawn. He match hi a pawimawh dawn khawp mai.

Arsenal hi Premier League hmahruaitu an ni mek a, City hi pathumna ni mah se, hmahruaitu Arsenal hi point khat chiahin an phak lo. Title race-a match pawimawh takah hian a chak zawk tan chuan dinhmun insawhnghehna tha tak a ni thei dawn.

Champion lai Man City chuan Arsenal hi hneh ngei an tum dawn, hetih lai hian an player pawimawh thenkhat Arsenal hmachhawn thei lo tur nia ngaih an awm nawk mai.

Player 7 lai chu dinhmun chiang loah an awm mek a, chung zingah chuan Kevin de Bruyne pawh a tel nghe nghe.

Kyle Walker, John Stones leh Manuel Akanji te chu ram tana an fehchhuahnaah an inhliam. Anni dinhmun hi sawi chian theih a la ni lo a, Pep Guardiola-a tan chuan lu tihai tham a ni.

Jack Grealish leh Matheus Nunes te pawh an dam hman dawn nge dawn lo sawi lawk theih a ni lo a, Brazil goalkeeper Ederson pawh Liverpool an hmachhawn tuma a inhliam kha a la dam chiang lo bawk.

Nunes chuan a keah hliam a tuar mek a, Portugal squad atang pawhin a inhnukdawk a nih kha. Player pawimawh Kevin de Bruyne chu tha hliam avangin harsatna a tawk mek.

De Bruyne hi City Under 23 team-ah training a nei a, Arsenal hmachhawn tur squad-ah telh a nih a rinawm. Hetih lai hian 100 per cent-in a fit hman erawh a rinawm loh a, bench lamah hun a hman phawt a rinawm.

Ngenna : Advertisement hi min click sak thin turin kan ngen a che u.

Arsenal lamah pawh player inhliam awm mah se, Bukayo Saka leh Gabriel te chu an fit hman rin a ni a, Saka hi international break laiin a chawl a, City an hmachhawn hunah a fit hman rin a ni.