Paul Merson chuan Arsenal chu Tottenham tluk pha lo nia sawiin, season tharah pawh Spurs chu a chungnung pali zinga an tel theih zawk a rin thu a sawi.
Pathianniah hian north London derby a awm dawn a, he inkhel hi Arsenal leh Tottenham tan chuan a pawimawh viau dawn a, season thara Europe khawmualpui inelnaa tel thei tur tih chian theihna kawng pawimawh tak pakhat a ni ang.
Arsenal chu tunah hian Premier League-ah pariatna an ni mek a, pasarihnaa awm Sheffield United aiin point 1 chiahin an hniam mek a, an hmelma lian Tottenham Hotspur aiin point 1 chiahin an sang bawk a. Nilaithawhtanah khan Spurs hi Bournemouth nen goal inpe loin an inhnehtawk a, hei vang hian pakuanaah hian an awm phah a ni.
Jose Mourinho leh a pawlte chu tun hnaia an match hnuhnung pangaah vawi hnih chiah an chak a, hetih lai hian Mikel Arteta pawlte ve thung chu an zia chho viau a, June 20 a 1-2 a Brighton an hneh loh hnuah khan changkan lam an pan chho leh tawh a ni.
Brighton an hneh loh hnuah Gunners chu inelna hrang hrangah vawi 4 an chak tawh a, chutih rualin an match hnuhnung berah Emirates Stadium-a an mikhual Leicester City nen 1-1 in an inhnehtawk a ni.s
Season chawhma lamah khan Emirates Stadium-ah Arsenal leh Tottenham hi an lo inkhel tawh a, Spurs chuan Mauricio Pochettino kaihhruaina hnuaiah chak theihna hun tha an nei a. Mikhual team hian 2-0 in hma an hruai hman a, a tawpah erawh 2-2 in an inhnehtawk leh ta a ni.s
“Pathianniah north London derby a awm dawn a, a chak zawk tur sawi thiam a harsa viau mai a. Kawng hrang hrang atanga thlirin Arsenal hian Tottenham chu an tluk pha lo deuh a ni ber a, hetiang a nih avang hian Spurs hi an chak zawk a rinawm,” tiin Paul Merson chuan a sawi.
“Anni pahnih hi tun season tawpah chuan a chungnung pali zingah an tel thei dawn lo ve ve a, season thar lamah erawh chuan Tottenham hi Arsenal ai chuan a chungnung pali zinga tel thei turin an rinawm zawk daih,” a ti bawk.
A sawi zelnaah, “An squad ka en hian game 38 khelh zawhah Arsenal hi Tottenham chunga an awm theih ka ring ngam chiah lo a. Leicester City nen an inkhelh khan Arsenal chu an che chhe lo hlein ka hria a, chutih rualin Everton laka Spurs chet dan kha a tha lehzualin ka hria,” a ti.