Robert Pires chuan a club hlui Arsenal chu season tawpah Premier League top 4-a an awm ngei a rin thu a sawi.

Khelh riat khelh tawh hnuah Arsenal hi Unai Emery hnuaiah palinaah an awm mek a, hmahruaitu Manchester City chu point hnihin an pha lo. Manchester City, Chelsea leh Liverpool-te hi an point hmuh zat inang vekin City hi an goal difference a san ber a vangin Premier League hmahruaitu an ni.

Season liamta khan Arsene Wenger-a hnuaiah Arsenal hi parukna niin, 2016-17 season khan pangana an ni tawh bawk. Tun season-ah palina tal an nih theih chuan hmasawnna a ni dawn tih a chiang a, Pires chuan Arsenal chu a hniam berah palina an nih ngei a rin thu sawiin, chu chu 100% -a a chian thu a sawi bawk.

Pires chuan, “Tunah chuan Arsenal hi ka lawmpui a, ka club hlui a nih bakah club tan ambassador ka nih bawk avangin ka lawmpui lo thei lo. Manager thar Unai Emery pawh a che tha a, ka lawmpui em em a ni.”

“Emery that zia hi Sevilla leh Paris Saint Germain-ahte kan hmu tawh. Nitinin hmasawn a ngai a, Arsenal hi an che tha em em a, Premier League-ah phei chuan an che tha lehzual. Tunah hian game kua a zawnin an chak tawh a, top four-ah an awm ngei ka ringa, chu chu 100% in ka chiang a ni,” a ti,

Emery hnuaiah hian London club hian game 11 an khel tawh a, season tan tirah Manchester City leh Chelsea-te hneh lo nghal mahse tunah an insiamrem a an che tha chho mek. Arsenal hian goal 29 thun tawhin goal 13 an chhuah tawh bawk a ni.