​Arsenal hi team nem leh chawrche tak an ni - Roy Keane

02nd October 2015, 03:10AM

Mid-week khan Champions League Group Stage match-ah Arsenal chuan 3-2 in Olympiakos an hneh lo, Manchester United captain lo ni tawh thin Irishman Roy Keane chuan Arsenal kha team nem tak leh chawr che tak an nih thu a sawi chhuak.

Emirates Stadium-ah khan Arsenal kha chak zawk tura rin an ni a, mahse set piece atangin goal an chhuah leh ta a. Tin, Petr Cech aia Wenger-a'n a thlan Ospina chuan ho takin an lamah a hui lut bawk.

"Arsenal team kha team nem tak leh chawrche tak an ni. In lo hmu vek anga, an goal chhuah dan kha goal ho tak tak vek a ni. Set piece atangin goal hnih an chhuah leh nghe nghe a nih kha.

"Khatianga defending an khel a nih chuan match lianah hnehna an chang ngai lovang. Hruaitu tha an nei lova, chak turin theihna an nei lo a ni," tiin Roy Keane chuan a sawi. Champions League Group Stage match hnih khelh tawhah Arsenal hi an la chak lo ve ve a ni.

Ospina chetsual chungchangah Wenger-a thutlukna chuan dem a hlawh hle a, inkhelh zawh Press conference neih naah Arsene Wenger chu a thutlukna chungchang zawh a ni a, thinrim takin Wenger chuan,

"Khami chungchanga ka thutlukna sawi turin hetah hian ka thu lo, season hmasa khan Ospina hian game 19-ah clean sheets vawi 14 lai a nei. Kar hmasaa Tottenham kan hmachhawn tum pawh khan ropui takin a khel. Goalkeeper tihsual nei ngai lo hi an awm lo. Petr Cech-a chungah pawh a thleng thei reng bawk, hei hi chu thil thleng ve thei a ni e," tiin a sawi.

Tun Pathianni lo awm turah hian Manchester United chuan Emirates Stadium-ah Arsenal an tlawh dawn a, United aiin Arsenal-in ni khatin chawlh an nei hnem hret dawn a, Van Gaal chuan hei hi chhuanlam a tlin loh thu leh an chak ngei tur thu a sawi nghe nghe a ni.

Copyright © inkhel.com 2024. All rights reserved.