05 Dec 2018 04:58

inkhel

Arsenal hi team hlauhawm ber pawl an ni: Rashford

Marcus Rashford chuan Arsenal chu tun hnaiah Premier League club zinga khawng ber pawl an nih thu sawiin, Unai Emery hnuaiah an hlauhawm chho hle tih a sawi.

Manchester United chuan Old Trafford-ah Arsenal hi an mikhual dawn a, tun hnaia an game hnuhnung pathuma chak zawn Arsenal chuan Pathianni khan North London Derby-ah Tottenham Hotspur chu 4-2 in an hneh bawk a, an boruak a alh chho mek a ni.

February 2016 khan Manchester United chuan Premier League-ah Arsenal chu 3-2 in an hneh a, he inkhelah hian Rashford chuan United tana a goal hmasa ber a thun nghe nghe a. Zanina an inkhelh hunah hian goal a thun leh thei dawn nge dawn lo tih chu a rilruah a lian ve hle a, kha game kha Rashford chuan theihnghilh harsa a tih thu a sawi chhuak.

“Kha game khan ka thinlungah hmun pawimawh a luah reng a, ka tan chuan theihnghilh theih a ni tawh lo. Old Trafford-a Arsenal kan hmachhawn te leh tuna Arsenal hi chu an inang tawh lo hle a, tuna mi hi chu danglam tak an ni,” tiin Rashford chuan a sawi.

“Tuna Arsenal kan hmachhawn turte hi chuan football tak tak an khel a, an tal na thei viau a, a nihna takah chuan Premier League club zinga hlauhawm ber pawl an ni mek a. Eng pawh ni se, theihtawp kan chhuah ang a, point 3 hmuh theih ngei kan tum dawn a ni,” a ti bawk.

Tun hnaiah Arsenal an chet that chhoh viau laiin Manchester United chu an che fuh thei meuh lo thung a, an game hnuhnung paliah Jose Mourinho pawlte chu vawi khat chiah an chak a, UEFA Champions League-ah Young Boys chu hun tawp dawna Marouane Fellaini goal hmangin 1-0 in an hneh hlauh a ni.