Arsenal hi kan awm duhnaah kan awm lo: Emery

30th November 2018, 01:11AM

Unai Emery chuan Arsenal chu an duhnaa an awm loh thu sawiin, Europa League khelh chu an duh dan a nih loh thu a sawi.

Arsenal chuan season hnih chhung Europa League an khel ta a, Arsene Wenger hnuaiah tlakhniam lam an pan tak zel avangin an club chawisang leh turin Unai Emery an ruai a. Tun season atangin Emery chuan Arsenal a enkawl tan a, season bul tanna game 2 ah an tlawm a, chumi tih loh chu chak loh an nei leh tawh rih lo a, game 17 chhung chu chak loh an nei ta rih lo a ni.

Emery hnuaiah Arsenal chuan beiseina an nei thar leh mek a, Premier League title te pawh an sawi ri tan a, hei mai bakah hian Europe khawmualpui inelnaa hlawhtlin an duhna chu tihhlawhtlin theih an beisei tel bawk a ni.

Spanish coach Unai Emery hian Europa League title chu vawi thum a la tawh a, hetiang a nih avang hian Arsenal pawhin Emery zara European title neih ve theih an duhin an beisei a. Europa League lamah pawh an che chhe lo rih viau a, a tawp an thlen theih dawn leh dawn loh erawh sawi chian ngam a la ni lo thung.

“A pawimawh ber chu a innghahna lungphum tih ngheh a ni a. Spain rama ka awm lai khan Champions League emaw, Europa League emaw khelh theihna hun tha kan nei a. Champions League lamah chuan Real Madrid emaw, Barcelona emaw te kha champion thei tura rin kai nghal an ni a, Atletico Madrid chu Europa League champion an nih khan an hmabak Champions League title a ni leh a, final-ah vawi hnih an lut ta reng a ni,” tiin Emery chuan a sawi.

“Sevilla ka enkawl khan Champions League khel thei dinhmunah kan ding ta lo a, mahse Europa League kan khel thei ta tho a. Kan thlen chinah theihtawp chhuahin kan bei tur a ni tih kha kan tum dan a ni a. Chutiang tak chuan kan bei chho a, kan hlawhtlin theih phah ta reng a ni,” a ti bawk.

A sawi zelnaah, “Arsenal ka zawm khan Europa League khel tur an ni tih ka hria a. A nihna takah chuan he club hian Europa League khelh hi an tumin an duh lem lo a, a aia sang an duh a. Champions League khelh duh viau mahse tunah chuan tih ngaihna a awm rih lo a, mahse theihtawp kan chhuah ang a, a lehpekah chuan Champions League lamah kan tel ve thei tawh turah kan ngai a ni,” a ti.

Copyright © inkhel.com 2024. All rights reserved.