Patrick Vieira chuan Unai Emery thlaktu nih kha a tum loh thu sawiin, Nice-ah a nghet tlat a ni tih a sawi.

Arsenal captain hlui Patrick Vieira chu 2018 a Arsene Wenger a chhuah hnuah khan Gunners enkawl tur anga sawi tan a ni a. Nikum November thlaa Unai Emery an ban hma deuh atang tawh khan Vieira chu manager thar ni thei tura sawi a ni leh bawk a, a tawpah erawh Mikel Arteta chu an ruat thung a ni.

French coach chuan Arsenal enkawl thei turin club thuneitute nen inbiakna an neih loh thu sawiin, Nice enkawl chu a la duh ber thu a sawi a, Arsenal khan bia pawh ni se hnar tho a tum thu a sawi chhuak.

Vieira chuan, “Arsenal enkawl turin tu mahin min rawn be lo a, min rawn bia pawh ni ta se ka lo hnar tho tho ka ring a. Tun dinhmunah chuan Nice enkawl bak hi ngaihtuah ka nei lo a, thil dang tih tumna ka nei lo hrim hrim a ni,” a ti.

“Tuna ka hna hi ka inhmeh tawk em em a, hei baka duhthusam hi ka nei rih chuang lo a. Arsenal nen min sawi zawm thin a, khatiang khan min ti danglam lo reng reng a, keimahah awmzia a nei lo hle,” a ti bawk.

A sawi zelnaah, “Ka awm zel dan turte chu engmah sawi lawk theih ka nei lo a, chutih rual chuan thil awm miah lo leh thleng miah loah ka rilru ka lo sen kual ve vak kha a tul lo a, awmzia a nei lo a. Nice thuneitute pawhin helai hmunah hian ka awm zel duh a ni tih an hre chiang a, awm zel tur pawhin min duh hle a. Chu chu ka tan a tawk viau a ni,” a ti.

Arsenal enkawl chu a tum loh thu a sawi rualin, Nice coach a nih hma khan Arsene Wenger thlaktu tur anga sawi a ni tih erawh Vieira chuan a sawi chhuak a. Thawm eng eng emaw awm mah se a takah engmah a thleng ta lo a, awmzia a awm thui loh thu a sawi tel bawk a ni.