Thierry Henry chuan Arsenal enkawl chu a chak reng thu sawiin, engtikah emaw Emirates Stadium-a kir leh a duh thu a sawi.
Arsenal legend Thierry Henry hian 1999 leh 2007 inkarah khan Gunners tan a hun a hmang thin a. Hemi chhung hian Arsenal chu trophy lian paruk lakpuiin, heng zingah hian Premier League title pahnih pawh a tel a, 2012 kumah khan loan-in rei vak lo chu Arsenal-ah hian a let leh bawk a ni.
World Cup winner Henry hian Arsenal tan game 376 khelin hengah hian goal 228 zet mai a thun hman a. Gunners tana goal thun hnem ber nihna a chelh mek a, an club player lo ni tawh zawng zawngah chuan a la tha ber ti hiala sawi a ni.
Arsene Wenger an ban hnua Unai Emery an lak luh hma deuh khan Thierry Henry chu Arsenal enkawl tur angin thawm a awm hman a, he thawm karah hian Emery kha an ruat ta thung a. Hetih lai vel hian Henry chu Belgium national team manager Roberto Martinez chuan assistant atan a hmang a ni.
Emery chuan Arsenal a enkawl tak avangin Henry chu Monaco enkawl tura ruat zui a ni a. Amaherawhchu, game 20 khelhah French club chu vawi 4 chiah a chakpui theih avangin thla thum chhung chauh a hna chu a chelh a, a bang zui leh ta daih a ni.
Montreal Impact chuan Henry chu nikum November thlaah khan kawng an hawnsak a, Major League Soccer season thar atan an inpuahchah chho mek a, heti chung hian kum 42-a upa Henry chuan Emirates Stadium lam panna hun tha inher chhuak se a la ti reng thung a ni.
Henry chuan, “Arsenal enkawltu nih theih hi ka duhthusam a la ni reng a, ka thih hma hi chuan he club enkawl hi ka chak reng dawn a ni,” a ti.
“Arsene a chhuah hma atang tawh khan thil kha a fuh lo laklawh tawh a, engkim mai kha a buaithlak a ni ber a. Wenger thlaktu tura beisei zingah ka hming te pawh kha an sawi ri ve nghe nghe a ni,” a ti bawk.
A sawi zelnaah, “Coaching ka luhchilh hnuah hian thil ka hre chiang ve ta zel a, kan thil hriat apiang te, mi sawi apiang te hi awih vek chi a ni lo tih hriat a tha a, a dik vek ngai lo hle a. Hetiang thu thang hi chu buaipui dan tawk neih thiam a lo ngai hle a ni,” a ti.