Arsenal defender Stephan Lichtsteiner a chhuak dawn

04th June 2019, 04:06AM

Stephan Lichtsteiner chuan Emirates Stadium-ah season khat chauh hmang mahse Arsenal a chhuahsan dawn tih a puang.

Switzerland defender Stephan Lichtsteiner hi Unai Emery-a’n Arsenal a enkawl hnua player a lak luh hmasak ber niin, nikum nipui laia transfer window inhawngah khan Juventus atangin free transfer-in an la a. Arsenal a zawm hnuah season khat chhungin inelna hrang hrangah game 23 chu a khel hman a ni.

Kum 35-a upa Lichsteiner hi Emery chuan rinrawl berah a nei hran lo a, defender dang remchan loh deuh changa chhawr atan a hmang deuh ber a. Lille leh Lazio defender hlui hi Premier League velah chuan a tel tam lo hle a, Europa League bakah FA Cup leh League Cup velah a inlan hnem ber a ni.

January thla khan Hector Bellerin chu a inhliam a, season tluana inkhel thei tawh lo tur niin, Lichsteiner tan hun tha a inher chhuak a tih theih a. Mahse, amah ai hian Shkodran Mustafi leh Ainsley Maitland-Niles te chuan bul an tan ngun ta zawk a, Arsenal game hnuhnung 18-ah vawi hnih chiah bul a tan ve hram a ni.

Tun season chhunga Arsenal game hnuhnung berah Lichsteiner hi substitute bench-ah a thu tluanchhuak a, Europa League final-a Chelsea in 1-4 ngawta an sawp tum khan Emery chuan a luhtir ve ta lo a ni.

Lichsteiner hian Instagram-ah chhuah a tum thu hi tarlangin, Arsenal tantute mai bakah a teammate te leh club staff te hnenah lawmthu a sawi a. Baku-a Europa League final an khelh tuma an tlawm avanga a rilru nat thu pawh a tarlang tel bawk a ni.

“Gunners te u, he club chanchinah bung thar duhawm tak kan kai teuh tehreng nen, kan beisei ang thil a thleng ta lo a, pawm a harsa duh khawp mai. Ka hrilhhai tak zet a. Arsenal chu dinhmun sang taka vawrh chhoh leh kan tum hle a, trophy pawh lak theih ngei kan tum ve hle a, kan thei ta rih lo a, heng thil pahnihte hi he club nen hian a inkawp tlat a ni,” a ti a.

“Ka khelhpuite, coach leh staff te bakah he club hnuaia thawktu zawng zawngte leh Arsenal tantute zawng zawng chungah lawmthu ka sawi a. A lehpekah chuan kan team hian thil ropui tak an hlen chhuak thei tawh ngeiin ka ring a, he club chanchina ka tel ve thei hi lawmawm ka ti hle a ni,” a ti bawk.

Stephan Lichtsteiner hi nipui transfer window inhawn dawna Arsenal chhuahsan tur palina niin, a hmain Aaron Ramsey leh Danny Welbeck te chu free transfer-in an chhuak tawh a, Petr Cech pawhin inkhelh a chawlhsan tawh a ni.

Lichsteiner hian 2001 khan Grasshoppers Zurich ah bul a tan a, hemi hnu hian Lille leh Lazio ah te a khel leh a, 2011 khan Juventus a zawm tan a. Bianconeri tan hian game 250 chuang a khel hman a, title lian 14 zet chu a lakpui hman a, heng zingah hian Serie A title 7 a tel a ni.

Copyright © inkhel.com 2024. All rights reserved.