Arsenal chuan Ajax Defender Jurrien Timber chu an la lut fel ta a, a manah hian Gunners hian €40million (£34.3m) bakah add-ons €5m (£4.3m) an seng nia report a ni.

Kum 22 mi Timber hian hun rei zawk atan Emirates Stadium-ah contract a ziak niin The Athletic chuan a tarlang.

"Ka unau te vang a ni Arsenal ka zawm, Arsenal supporter an ni a, kei pawhin Arsenal inkhel hi hmuhnawm ka ti ve em em thin. Player langsar tak tak an nei a, an khelh dan style te hi ka ngaina a, he club hi ka ngaina a ni," tiin Timber chuan Arsenal a zawm chhan a sawi.

"Ka naupan lai khan Robin van Persie leh Thierry Henry te kha ka ngaisang thei em em. Ajax atanga Arsenal pan hi an awm teuh tawh bawk a. Ka tan pawh hmun a lo awm ve reng a ni.

"Ajax player tan chuan he lai hmun hi a danglam bik hle. Ka phur em em a, tu pawh mai hi ka chungah an lo lawm niin ka hria. He club ropui tak tana inkhelh thuai thuai ka nghakhlel a ni," tiin Timber chuan a sawi bawk.

Timber hian Arsenal-ah jersey no. 12 a ha dawn a, William Saliba-a'n season thar atanga No. 2 a hak dawn avangin Timber hian No. 12 hi a chang thei dawn ta a ni.

Season liamta Eredivisie-ah khan Timber hi vawi 34 a inlan a, goal hnih khungin, assist vawi 2 a nei bawk.

Dutch centre back hi defense line-ah chuan, dinglam leh veilam sirah pawh a khel thei bawk a, Netherlands tan game 15 a khel ve tawh bawk.

Arsenal chuan West Ham atangin Declan Rice an la lut tep tawh bawk a, a manah Hammers leh Arsenal te chu £105m in an inrem tawh a. Tin, Chelsea atangin £65m-in Kai Havertz an la lut tawh bawk a, tun nipui bazarah Arteta chuan player langsar 3 a la lut dawn ta a ni.