16 Sep 2020 04:12

inkhel

Arsenal chhungkuaa ka tel thei kha ka lawm: Emiliano Martinez

Emiliano Martinez chuan kum 10 zet a lo khelh tawhna Arsenal a chhuahsan a, Gunners chhungkuaa a tel thei kha lawmawm a tih thu a sawi.

Argentine goalkeeper Emiliano Martinez chu Aston Villa-in £20 million in an lei a, kum li chhung atan contract an ziak a. A chhuah takah chuan kum 10 zet a lo awm tawhnaa hun a hmang thei kha lawmawm a tih thu a sawi a ni.

Martinez chuan, “Arsenal hnenah hian lawmthu ka sawi a. Ka chhuah dawn thlengin duat takin min enkawl a, hetiang taka min ngaihsak a min buaipuitute hi lawmthu ka hrilh mawlh mawlh a, hei baka lawmawm hi ka tan a awm lo ang,” a ti.

“Emirates Stadium-ah hian kum 10 chuang zet ka lo awm ve tawh a, ka zinkawng zawh kha a fuh tluantling bik hauh lo tih chu ka hria a. Hun harsa tawn chang pawh ka nei ve fo a, tunah hi chuan ka lawm hle a, goalkeeper la naupang ve leh chhawngte tan thawhrimna hi hlawhtlinna a ni tih chu a takin ka lantirin ka hria,” a ti bawk.

A sawi zelnaah, “Rim taka kan thawh chuan a tawpah keimahni bawk hi kan hlim thin a. Thinrim chang te, lungawi loh chang te chu kan nei theuh a, chutiang hun chu hnung lama dah thiam a pawimawh hle a ni,” a ti.

“Tuna chhuak tura thutlukna ka siam pawh hian Arsenal chuan min thlawp hle a, ka thutlukna chu min zahsak a, club tantute thlengin duhsakna min hlan nasa hle a. Ka tan chuan he club leh a chhevel mihring zawng zawngte hi an hlu a ni,” tiin Martinez chuan a sawi bawk a ni.

Kum 28-a upa Martinez chuan Arsenal tana a game hnuhnung pahnihah trophy pahnih a lakpui thei a. Bernd Leno inhliam vangin FA Cup leh Community Shield-ah te a khel a, heng trophy pahnihte hi an la ve ve a ni.

2010 kumah khan Emiliano Martinez hian Independiente atangin Arsenal hi a zawm tan a, Emirates Stadium-ah hian a langsar lo hle a, second keeper a nih loh pawhin third keeper te a ni tlangpui thin a ni.