David Luiz chuan June thla hian Arsenal-a a contract a hmang zo dawn nia sawi a ni a, contract thar chungchangah club lam nen inbiakna an la neih loh avangin, Brazilian defender hian Arsenal a chhuahsan maithei.

Luiz hi nikum nipui bazar lai khan Deadline Day-ah Arsenal hi Chelsea atangin a zawma, a manah Gunners hian pound maktaduai 8 an seng.

Nikuma Arsenal a zawm hian Luiz hian kum hnih daih contract a ziak niin chanchinbu mite chuan an tarlanga, mahse Sky Sports chuan kum hnih ni lovin, kum khat daih contract a ziak zawk niin an tarlang thar.

Manager Mikel Arteta hnuaiah Luiz hi a khel rim viaua, Arteta hian Arsenal hi game 15 khelhpui tawhin, heng zinga game 14-ah Luiz hian inkhel bul a tan.

Arteta chuan Luiz hi kawl chhunzawm zel a duh nia sawi a ni a, mahse Arsenal hian Luiz hi contract thar an la zawrh loh avangin Luiz hi a chhuak mai lovang tih a sawi theih lova, Arsenal hian contract thar an zawrh leh hnuhnawh lovang tih pawh a sawi theih chuang loh.

Luiz hian kum 2007 atanga kum 2011 chhunga a lo khelhna Portuguese club Benfica-a a hun a hman zawh duh thu a lo sawichhuak tawha, Luiz hian free-agent angin Benfica a zawm dawn nia sawi pawh a tam chho hle a ni.