Arsenal chuan an club chairman Sir Chips Keswick chu a retire thu an puanga, Arsenal hian chairman thar an nei rih dawn lo niin chanchinbu mite chuan an sawi nghal bawk.

Kum 80 mi Keswick hian kum 2005 khan Arsenal board hi a zawma, kum 2013 June thla khan chairman-a ruat niin, hetah hian Peter Hill-Wood a thlak.

Keswick chuan, “He football club ropui taka chairman ka ni thei hi a hlu in a ropui em em a, Arsenal hian ka thinlungah hmun pawimawh a luah reng thina, a luah chhunzawm reng dawn bawk.

“Tun season zawh ruala ka retire tur hi board hnenah he hripui len hma hian chiang takin ka sawi lawk tawh a, club hi Stan leh Josh te bakah board leh executive-te kutah awmin, anni kuta a awm hi ka ngaih a tha hle a ni.

“He hripui avanga buaina a zawh hnuah Arsenal hi chak takin an rawn thochhuak dawna, khawvel hmun hran hrana kan supporter-te ang tho vin, kan team khelh leh hun hi ka nghakhlel tawh hle a ni,” a ti.