Arsenal chuan chak an tum a, an chak ta a ni mai.
Bournemouth chuan Emirates Stadium-ah Billing leh Senesi hmangin 2-0 in hma an hruai.
Manchester City lahin si hnih faiin Newcastle United an lo hneh ve bawk si. Arsenal chuan points an hloh leh ngei ang a, City nena an inkar chu point 2 chiah a ni tawh dawn niin football fan-te chuan an ngai.
Champion chaka tui hal em em Arsenal player naupang rual ho chuan, an theihna zawng zawngin an khel. Partey leh Ben White hmangin an siphurh an rul.
Hun tawp dawn tak tak, added time 90+7 min-ah Reiss Nelson chuan Arsenal chakna goal a khung a, 3-2 in Gunners an chak ta a ni.
Pahnihna Manchester City nena an inkar chu point 5 a ni chhunzawm ta zel a, chakna goal khungtu Nelson hian tun season chhungin minute 64 chiah khel mah se, Bournemouth an hneh tum hian goal khat a assist bakah chakna goal a khung bawk.
Emirates Stadium-ah Arsenal-in si an phur hma hle, Bournemouth lamin an thah a, mual dinglam sir atangin an nawr phei nghal, Ouattara cross chu box chhung atangin Philip Billing chuan awlsam takin a chhuih goal.
Second half tir lamah Bournemouth chuan an goal hnihna an khung a, Joe Rothwell-a corner pet tha tak chu Marcos Senesi chuan a tauh goal a, si hnih faiin mikhual team-in hma an hruai.
Arsenal-in goal an khung ve tan ta, minute 62-ah corner an hlawhchhuak a, Emile Smith Rowe tauh chu Thomas Partey chuan hnai tak atangin a chhuih goal.
Minute 70-ah bench atanga lut Reiss Nelson chuan hna ropui tak a rawn thawk nghal, mual veilam sir atanga a cross chu Ben White chuan box chhung atangin a pet, Neto chuan lo beng chhuak mah se goal line a pel hman a, 2-2 a ni ta.
Arsenal chuan na takin an nawr chhunzawm zel a, an inhnehtawk dawn emaw tih tawh hnuah Nelson hmangin goal dang an khung leh. Added time minute 6 a ni a, 90+7 minute-ah Arsenal chuan corner an hlawhchhuak.
Bournemouth defender te chuan an tauh chhuak a, Nelson-a hmaah tak ball a tla, ani hian box chhung chiah atangin kawh zetin a pet a, a goal chiang hle, hun a tawp chhunzawm a, 3-2 in Arsenal chuan hnehna an chang ta a ni.
He match hi a hmuhnawm khawp mai, goalmouth action a tam, Neto chuan Odegaard leh Saka te a zawnin a dang. Arsenal-in an nawr na a, ball posessions pawh 81% lai lai nei.
Hetih lai hian counter attack hmangin Borunemouth chuan an nawr thin, hei hi Arsenal tan hlauhawm a ni thin bawk. Ramsdale chuan first half-ah clear chance a save.
Bournemouth-in counter attack an nei, mual veilam sir atanga Billing cross chu box chhunga lo awm Ouattara chuan free takin a shot a, a goal ngei dawn nia a lan laiin Ramsdale chuan a lo dan sak.
Ramsdale hian Solanke pawh a lo dang bawk a, Arsenal lamin goal khungna chance tha tak tak nei mah se goal khung an harsat, mahse a tawp lamah erawh goal 3 an khung ta a ni.
He match-ah hian penalty pek theihna tur tam tak a awm, Arsenal an vanduai kan ti thei awm e. Penalty hlawhchhuah an inbeiseina zawng zawng chu referee te chuan an hnawl sak vek a. A tawpah erawh hnehna an chang ta tho a ni.
Bournemouth hi relegation zone atanga tal chhuah tum an ni a, Arsenal tan pawh tawh an khirh hrep. Goal an khung hma avangin a tlarhnung pawh an rem phui tha em em.
Season chawhnu lam a ni a, Arsenal goal khung khawl te pawhin goal an khung reng thei bik lo. Hmachhawn hautak em em tura rinte lakah goal an khung nual a, hneh sa anga kan ngaihte erawh an bei tawk leh em em a. Hei hi Premier League hmuhnawmna a ni kan ti thei awm e.
Hma takin Trossard a inhliam, hei hi Arsenal chuan an tuar deuh niin a lang a. Thomas Partey erawh a khel ropui khawp mai, goal a khung emaw khung lo emaw, Arsenal player khel tha ber leh an innghahna a ni kan ti thei awm e.
Mikhual lamin si hnih faiin hma hruai mah se Arsenal-in champion an tum tlat, an theihna zawng zawngin an khel a, draw pawh an duh lo, chak an duh a ni tawp mai.
Arsenal-in shots vawi 31 lai an neih laiin an mikhual lamin shots vawi 4 chiah an nei. An thawhrimna leh chak an tumna chu a tawpah chhanin a awm, chak an tum a, an chak ta a ni.