​Arsenal a chhuahsan chhan dik tak Fabregas-a’n a sawi

25th March 2020, 06:03PM

Arsenal captain hlui, tunah AS Monaco tana khel mek Cesc Fabregas chuan kum 2011-a Barcelona pan tura Arsenal a chhuahsan chhan a sawi.

Fabregas hi Barcelona academy La Masia chhuak a ni a, Arsenal chuan kum 2003 khan la luta, Arsenal player pawimawh a ni chho a, naupang te in an club captain nihna pawh pek a ni nghe nghe.

Fabregas hi Arsenal fan-te duh rawn a ni a, Thierry Henry hnua an player ngainat rawn ber a tih theih. Heti chung hian kum 2011 khan Fabregas hi chhuakin Barcelona chuan euro maktaduai 30 chuang hretin an la luta, Arsenal fan-te an thinrim hle.

Fabregas hian Arsenal a chhuahsan chhan a sawia, Arsenal-a a awm lai khan Robin Van Persie leh Samir Nasri te lo chu a mah rawn phak an awm loh thu kum 32 mi hian a sawi.

Kum 15 mi lek niin Fabregas hian Barcelona atangin Arsenal hi a zawma, Arsenal tan hian game 303 lai khel hmanin, kum 2008 khan William Gallas thlakin Arsenal captain a ni.

Fabregas chuan Arsenal a chhuahsan chhan dik tak sawiin, “Captain ka ni a, keimah leh keimah kha pressure ka inpe nasa em em thin. Kan team kha eng emawa champion pui ka duh em em thina, kan theihna zawng zawng ka senga, kan chak loh chang te hian a chang chuan ka haw hnuah ka tap thin.

“Keimah khan ka tuar em em a, zan mut theih loh pawh ka nei fo. Kan han chak lova,rilru na em emin bus-ah kan chuang haw a, chutah player thenkhat chu an nui uar uara, Arsenal chhuahsana an kal lehna tur te an sawi thin.

“Heti ang hian eng emaw chen chhung hun ka hmanga, football mawi tak kan khel te kha chu keipawhin nuam ka ti em em a, mahse sawi tawh angin keimah kha pressure ka inpe nasa a, team kaihruai tur ka ni tih te leh thildang zawng zawng ka ngaihtuaha, mal riau te pawhin ka inhriat phah thin.

“Ka hun hnuhnung lam kum hnih emaw kum thum emaw chhung khan zep loh chuan Van Persei leh Nasri te bak kha rilru lam leh technical ang zawng pawhin min tluk pha an awm meuh lo. Hei hi chapo veng leh ngeiawm taka sawi erawh ka ni lova, khatih hunlaia ka rilru ka sawi chhuak mai a ni.

“Thil tam tak ka ngaihtuah thina, keimah kha ka ruak tlat bawk si. Ka taksa leh rilru hi ka seng ral a ni bera, club khan player an lak luh theih an lak luh si loh te khan ka rilru a ti hah em em thin. Player thenkhat khawsak dan te khan hmun danga vah chhuah te min ti chak thina, heng zawng zawng avang hian Arsenal kha ka chhuahsan ta a ni,” a ti.

Copyright © inkhel.com 2024. All rights reserved.