Italian goalkeeper ropui Gianluigi Buffon chu Paris Saint-Germain a season khat a khelh zuai hnuah kum sawm chuang daih a lo cham tawhna Juventus lamah a kir leh a, nimin lam khan a lut fel.

Buffon hi kum 2001 atang kum 2018 thleng khan Juventus tan a khel a, an club captain niin jersey no.1 a ha reng thin. Buffon hian nikum nipui lai khan Juve-a a contract hmang zovin a chhuak a, PSG lamah khelin, PSG-a a contract zawh rualin Juventus-ah hian a kir leh.

A chhuah chhungin Buffon-a lo hak reng tawh thin jersey no.1 chu Juve hian an first-choice keeper Wojciech Szczesny an pe a, captain atan Giorgio Chiellini an nem nghet zui nghal bawk. Kum khat hnuah Buffon a kir leh takah chuan Szczesny chuan a jersey no.1 chu Buffon hi pek a tum a, Chiellini pawh hian a captain arm-band chu Buffon hi hlan tum bawk mahse Buffon chuan hnar ve ve in jersey no.77 a ha dawn ta zawk.

Hemi chungchang hi kum 41 mi Buffon chuan sawiin, “Szczesny khan jersey no.1 kha pek min tum a, Chiellini-a’n captain arm-band min hlanchhawn a tum bawk. Mahse mite ta laksak ching mi ka ni lova, chuvang chuan ka hnara, no.77 hak hi ka rilruk ta a ni,” a ti.

Juventus-a a kir leh chungchang sawi zuiin Buffon chuan, “Ka lo haw leh thei hi ka lawm a, min tantute ka hmu leh thei che u hi ka lawm em em bawk a ni. Ka nuna ka la hlim ber zinga mi a ni a, ka career hlawhtlin zia hi ka hmuh fiah phah.

“Juventus sawmna hi a hnar theih lova, chuvang chuan ka lo kir a ni a, ka in a nih avangin he hmunah hian ka lo kir . PSG-ah Neymar leh Kylian Mbappe-te ka khelhpui thei kha ka lawm em em a, tunah Cristiano Ronaldo ka khelhpui leh thei tur hi ka lawm em em bawk a ni” a ti.