Argentine Motorcycle Grand Prix neih zawh takah world champion ni lai mek Honda rider Marc Marquez chu tlanchak berin pakhatna dinhmun a luah.

Tun season-ah race pahnih neih a ni tawh a, race hmasa ber Qatar-ah chak lo mahse Argentina-ah erawh kum 26 mi Marquez a chungnung hle a, pahnihna Yamaha rider Valentino Rossi aiin second sawm dawnin a a thleng hma zawk.

Rossi hian a championship debut a neih atanga kum 23 a liam hnuah pawh Ducati rider Andrea Dovizioso hmakhalhin pahnihna a la ni thei a, kum 40 mi Rossi leh Dovizioso-te hian vawi 12 lai an dinhmun an inthlakthleng hnuah Rossi hi a chungnung ta zawk a ni.

Argentine MotoGP-ah hian Ducati rider Jack Miller chu palina a ni a, Suzuki rider Alex Rins chu pangana a ni bawk. Grand Prix neih leh tur hi USA lamah a ni dawn a, tun thla April ni 14-ah Austin, Texas-a neih a ni dawn a ni.

Argentine MotoGP result:

1. Marc Marquez (Spa/Honda) 41mins 43.688secs

2. Valentino Rossi (Ita/Yamaha) 41:53.504

3. Andrea Dovizioso (Ita/Ducati) 41:54.218

4. Jack Miller (Aus/Ducati) 41:55.828

5. Alex Rins (Spa/Suzuki) 41:56.251

6. Danilo Petrucci (Ita/Ducati) 41:57.438

7. Takaaki Nakagami (Jpn/Honda) 42:01.848

8. Fabio Quartararo (Fra/Yamaha) 42:04.091