Argentina chuan kum 1986 hnuah World Cup an chawi leh ta a, football khawvela ram inelna sang ber leh show lian berah pakhatna an nih avang hian Argentina ti tuah hum rih mai ang aw.
Argentina hi kum 2014 khan an champion teuh hle a, final-ah Germany 1-0 a hneh loin pahnihna dinhmunah an ding ta a nih kha. Kum 4 kal ta pawh khan round of 16 ah France nen inhmachhawnin 4-3 in an lo tla tawh bawk.
Kumin World Cup-ah pawh mi tam tak chuan champion turin an ring kher awm lo e. A bikin mizote rilruah ngat phei chuan Argentina ai hian Brazil te, England te, Portugal te leh France te an langsar zawk ngei ang.
Amaherawhchu, rinhlelh rual lohin Argentina chu World Champion an rawn ni ta si a, an captain Lionel Messi chuan a vawikhat nan World Cup trophy a rawn chawi ta. An champion-na kawngah hian player pawimawh ber a ni teh meuh mai, tute pawhin kan lawmpui vek bawk ang. Messi kan sawi rik chul lai hian nomawi an chawi theih nana mi pawimawh tak inthup, an head coach Lionel Scaloni hi hmaih chi a ni lo ang. Scaloni hi han belchiang ve thuak thuak ila –
Manager anga Lionel Scaloni sulhnu
Kum 2018 khan Argentina national team hi a enkawl tan a, hemi hma hian Argentina under-20 team a lo enkawl ve zawk bawk. Qatar World Cup tan hma kha Argentina hian vawi 50 chiah chiah a enkawlna hnuaiah an khel hman a.
Scaloni hian kum 2019 Copa America ah Argentina tan fiahna hmasa ber an hmachhawn nghal a, hetah hian pathumna dinhmun chauh an la hauh phak.
Kum 2 a liam leh hnuah erawh chuan Scaloni hian Argentina hi kum 2021 Copa America final a thlenpui ta a, Brazil chu 1-0 a hnehin an champion ta a ni.
World Cup khelh zawh tak group-stage a Saudi Arabia lakah 2-1 a an tlawm kha kum 2019 July thlaa Brazil 2-0 a an hneh loh hnua an tlawm lehna hmasa ber a ni.
Scaloni’s Argentina record:
| Year | Games | Wins | Draw | Losses |
| 2018 | 6 | 4 | 1 | 1 |
| 2019 | 15 | 8 | 4 | 3 |
| 2020 | 4 | 3 | 1 | 0 |
| 2021 | 16 | 11 | 5 | 0 |
| 2022 | 16 | 13 | 2 | 1 |
| Overall | 57 | 39 | 13 | 5 |
Lionel Scaloni hi kum engzat nge a nih?
Scaloni hi kum 44 chauha upa a ni a, May 16, 1978 khan a piang.
Kum 2022 Qatar World Cup-a coach naupang ber niin Cameroon coach Rigobert Song khan a dawt chiah a, ani kha kum 46 a upa a ni ve bawk.
Argentina coach lo ni tawh thin Juan Jose Tramutola kha World Cup chanchina coach ni thei naupang ber a la ni char char a, ani khan kum 1930 khan kum 27 chauha upa niin Argentina chu World Cup-ah a kaihruai a ni.
‘La Scaloneta’ awmzia? Engvanga Argentina hi hetia ko nge an nih?
Kum tlem te liam ta khan Argentina team hian hming lem an nei a, chu chu ‘La Scaloneta’ tih a ni.
Scaloni hming hi 'camioneta' tihna a ni a, chumi awmzia chu bus emaw van tihna a ni.
Scaloni leh a nau te hi hetia an than chhan ber chu Scaloni enkawl hnuah an tlarhnung a phui tak em vang a ni, bus hun tlat ang maiin an tlarhnung hi a nghet. Kum 2022 a an game khelh hmasa vawi 8 ah goal thum chauh an chhuah bawk.
Hemi avang hian mi thenkhat chuan Scaloni leh a nau te hi La Scaloneta tiin an ko a, sap tawng chuan ‘The Scaloni Bus’ tihna a ni.
Lionel Scaloni hnuaia Argentina coaching staff
Scaloni hian Qtar World Cup khel tur hian assistant coach pathum a hruai a, chung te chu Pablo Aimar, Roberto Aimar leh Walter Samuel te an ni.
An pathum hian Argentina tana lo khel tawh te vek an ni a, club tan pawh hlawhtling taka lo khel tawhte vek an ni. Samuel phei hi chu Inter Milan-in kum 2009/10 season chhunga UEFA Champions League an chawi tum khan a lo tel ve tawh nghe nghe.
Scaloni pawh hi head-coach a nih hma hian kum 2017-18 chhung khan Argentina assistant coach a lo ni ve hman tawh bawk.
Lionel Scaloni enkawl tawh te
Sevilla atanga inkhelh a chawlhsan hnuin Scaloni hian kum 2016 khan Sevilla ah vek hian coaching anga a hna chu a zawm ve nghal a, hetah hian assistant angin an chhawr.
Hemi hnu hian an mahni ram Argentina tan tan assistant ang thawk zawmin, kum 2018 khan Argentina under-21 team chu head coach angin a enkawl tan. Kum 2018 vek hian Argentina coach nil ai Jorge Sampaoli chu thlakin Argentina head-coach hi a ni ta a ni.