Argentina hmeichhe team forward Yamila Rodriguez chuan a kea Cristiano Ronaldo tattoo a chhut avangin Lionel Messi a haw lo tih a sawi.

A tattoo avang hian social media-ah sawiselna leh diriamna a tawk nasa khawp mai a, mi thenkhat chuan Argentina fachuam Messi laka zahna lantir turin an ngen. Messi leh Cristiano hi hunrei tak chhung an inel tawh a, an ropui ve ve avangin tha zawk tia sawi theih an awm lo.

Rodriguez chuan, "Ka tattoo avang hian Messi ka duh lo tihna em ni? Min sawiselnate hian keimahah nghawng a nei hauh lova, min diriamna leh min hmuhsitnate hian min tina viau thung. Tute pawhin duh ber leh ngaihsan berte chu kan nei vek a ni lo'm ni?

"Messi hi kan ram tana mi chhuanawm leh team captain a ni a, Cristiano ka ngaihsan ber avang leh ka entawn avangin ka haw ta e tihna a nilo. Footballer kan nih angin ngainat zawng leh thil atchilh kan nei ve theuh a, kan pholan avangin thildang kan hnual suat chuang lo. " tiin Instagram-ah a tarlang.

Kum 36 mi Messi leh kum 38 mi Cristiano-te hian belhkhawmin Ballon d'Or vawi 12 an la tawh a, La Liga leh Champions League-ah te pawh sulhnu an nei tha hle. 2009 leh 2018 inkar khan boruak an nei lian khawp mai a, hetih lai hian Barcelona-ah Messi a awm a, Real Madrid-in Cristiano an kawl ve bawk.

Rodriguez hian a malpuiah Diego Maradona chuanna tattoo pawh a nei tel a, rilru zau zawk pu turin a fan-te a chah. Argentina hian FIFA Women's World Cup khelh mekah point an la hmu lova, Zirtawpni chhunah hian South Africa an hmachhawn leh dawn a ni.