Italy head coach Roberto Mancini chuan, kumin FIFA World Cup-ah team tha tak tak awm mah se, Argentina chu an champion a rin ber thu a sawi.

Euro 2020-ah khan Italy hi an champion a, hemi hnu hian Copa America champion Argentina nen June thla khan Wembley-ah an inhmachhawn a, Italy hian Argentina hi si thum faiin an hneh lo.

Italian coach Mancini chuan, “Team tha tam tak an awm a, mahse champion tura ka rin ber ka thlang dawn a nih chuan Argentina ka thlang ang. Kan inkhelh khan an thatzia ka hmu,” tiin a sawi.

Italy hi European champion ni mah se, rin loh takin World Cup play off ah North Macedonia an hneh lova, kumin World Cup khel turin an inpet tling zo lo. Mancini leh a nau te hi kum 2018 World Cup-ah pawh khan an inlan tawh lova, a zawnin World Cup-ah vawi li champion tawh Italy hi kan hmu dawn lo.

Kumin World cup khel tura an inpet tlin zawh loh chungchang zawhna chhangin, “Kan rawn tho chhuak leh nghal a, Nations League group-ah pakhatna kan ni a, kan group ah khan Germany, Hungary leh England te an awm a, group awlsam a ni lo chiang hle.

“Mahse tuna kan hrehawmna hi chu December thla laihawla World Cup a zawh thleng kan tawrh a ngai dawn a, a dawt lehah chuan tun aiin kan tha tawh ang,” tiin Mancini chuan a sawi belh bawk.

Italian hian Nilaini khan friendly match inkhelah 3-1 in Albania an hneh a, a zawnin vawi thum an chak mek a, friendly match-ah tho Austria an hmachhawn leh dawn a ni.