30 Jul 2020 06:00

inkhel

Archery Training Centre leh Office hawn a ni

July 30, 2020 (Ningani) tlai dar 4:00 hian Republic Veng-a Archery Training Centre leh Office chu Pu V.Lalzawmliana, Vice President, Mizoram State Sports Council leh President, Archery Association of Mizoram chuan a hawng.

Republic veng field chhaka Archery Training Centre hi a dung metre 50 a ni a, practice/training-na tur target board pahnih a awm a, Mizoram State Sports Council-in a siamsak a ni.

Khual lian Pu V.Lalzawmliana, Vice President - MSSC chuan Sports Association 32 zingah training centre nei lo engemawzat an awm laia Archery-in training-na tur hmun \ha tak an nei chu lawmawm a tih thu a sawi a, tun dinhmunah duhkhawp ni lo mahse changtlung zawka siam chhoh zel a beisei thu sawiin Olympian nei tawh an nih anga Olympian dang chherchhuak leh thuai tura tan an lak mek thu a sawi.

Pu V.Lalzawmliana chuan, Union Tribal Affairs Minister Arjun Munda hnenah an mamawh chi hrang hrangte an thlen thu sawiin Zemabawkah Archery tan hmunhma tha zawk, competition neih theihna tur an thlen thu te, Archery Association of Mizoram hmasawnna tur an thlente a lo dawnsawn that thu a sawi a, training centre bultanna tur tha tak siamsaktu MSSC chungah lawmthu a sawi.

Thusawitu dang Pu Rosangliana, AO, MSSC chuan Sawrkar laipui duhsak tlak khawpa infiammi chherchhuak turin Archery Association a fuih a, ' Football leh Hockey hmasawnna tura sawrkar hmalakna hrang hrang kan thlir chuan India ram huapa hming lang pha Jeje Lalpekhlua leh Lalremsiamite an neih vang a ni ber a, an zarah hmalak a awlsam bik hle a ni' a ti. Thusawitu dang Pu James Lalramnghaka AE pawhin training centre an siamsak chu bul tanna mai chauh a nih thu leh a aia tha zawk sawrkarin a buatsaihsak zel a beisei thu a sawi ve bawk.

Archery Training Centre hi a dung metre 50 chauh a nih avangin International standard a tling phak lova, metre 70 tal a tlin a ngaih thu leh tuna an hmun hma chu la zauh theih an nih thu te, zir tantir (beginners) leh pangngaia practice thei tawh (advance) tan hmun khata training ho theih a la nih loh thu bakah tun hnaiah Mizo thalkapthiam 10 zet chu Assam Rifle Public School-a lut tura thlan an nih thu Archery Association hruaitute chuan an sawi bawk.

(adsbygoogle = window.adsbygoogle || []).push({});