​Aragon Grand Prix-ah Marquez pakhatna

26th September 2016, 02:09AM

MotoGP championship leader Marc Marquez chu Aragon Grand Prix-ah pakhatna a nih avangin point 52 laiin pahnihna Rossi lakah a fal ta a. Intlansiak vawi 4 chiah a awm tawh a, champion turin dinhmun tha takah a insawhnghet chho mek a ni.

Aragon-ah hian Yamaha rider Lorenzo chu pahnihna niin Valentino Rossi chu pathumna a ni a. Maverick Vinales chu palina niin Cal Crutchlow chu pangana a ni.

Pole atangin Marquez hian bul tan mahse Lorenzo leh Vinales te an tlan chhuak tha hle. Marquez chu hmahruaitu rawn ni chho mahse rei an tlan hmain turn 7-ah a duh aiin a nawr na a, a chesual teuh hle, a brake hrawk a, hei vang hian a tlan muan phah chhunzawm ta a ni.

Rossi pawh 6-na atangin bul tan mahse hma a sawn chho zel a, a team-mate Lorenzo lehpelin pahnihna a ni chho. Lap 15 a la awmin Rossi chuan hma a hruai ta nge nge a, hmahruai ngar ngartu Vinales a kual sual bawk nen, Vinales chu a hnung ta rawih rawih a.

Marquez chuan theih tawp chuahin hma lam a pan ngar ngar a, lap 12 a la awmin Rossi pelin hmahruaitu a ni ta der mai. Marquez a fal tual tual a, Rossi chu a team-mate Lorenzo chuan a hnaih tual tual bawk a, Lap 5 la awmin Lorenzo chuan Rossi a pel ta nge nge a.

Pahnihna dinhmun inchuh a hmuhnawm hle a, Rossi chuan Lorenzo a um ngar ngar, a pel teuh thin hle. Lap 2 la awmin turn 12-ah Rossi a kual zau ta hlauh mai, Lorenzo chu pahnihna a ni a, Rossi chu pathumna a ni ta a ni.

Nikum-a a chetfuh lohna Turn 7-ah tho Marquez a chesual teuh hle a. Amah pawhin a pha lo, "Engkim kha duhthusam a ni a, mahse chetsual erawh a awl hle. turn 7-ah khan harsatna lian tak ka nei a. Leiah ka tlu ngei dawn niin ka inhria. Mahse engtin nge ka tluk loh theih kha a chhan ka hre bik lo.

"Zawi muangin hma ka sawn chhoh leh hret hret a, Valentino ka hnaih khan hun thawl ka nei thei ta a, lap khat kha ka hahdam, chutah ka attack ta a, ka tlan pel ta a ni." tiin Marquez chuan an intlansiak chungchang a sawi.

Tyre hman fuh a pawimawh hle a, tun season-ah Marquez-a tyre a fuh thin hle a, Aragon-ah pawh tlankawng leh bike ke a inman nghet tha leh hle a, chu chu a chungnun phah leh ta nge nge a ni.

October thla chawhnu lamah Motegi Circuit-ah an tlan leh dawn a, hetah hian Marquez chu a chetha a nih chuan champion thei dinhmunah a ding dawn a ni.

Aragon MotoGP result:

1. Marc Marquez (Spa) Honda - 41 minutes 57.678 seconds

2. Jorge Lorenzo (Spa) Yamaha - 42:00.418

3. Valentino Rossi (Ita) Yamaha - 42:03.661

4. Maverick Vinales (Spa) Suzuki - 42:05.916

5. Cal Crutchlow (GB) Honda - 42:10.899

6. Dani Pedrosa (Spa) Honda - 42:14.750

7. Aleix Espargaro (Spa) Suzuki - 42:16.200

8. Pol Espargaro (Spa) Yamaha - 42:17.110

9. Alvaro Bautista (Spa) Aprilia - 42:20.749

10. Stefan Bradl (Ger) Aprilia - 42:25.576

World championship standings (race 14 of 18):

1. Marc Marquez (Spa) Honda - 248 points

2. Valentino Rossi (Ita) Yamaha - 196

3. Jorge Lorenzo (Spa) Yamaha - 182

4. Dani Pedrosa (Spa) Honda - 155

5. Maverick Vinales (Spa) Suzuki - 149

6. Cal Crutchlow (GB) Honda - 105

7. Andrea Dovizioso (Ita) Ducati - 104

8. Andrea Iannone (Ita) Ducati - 96

8. Pol Espargaro (Spa) Yamaha - 96

10. Hector Barbera (Spa) Ducati - 84

Copyright © inkhel.com 2024. All rights reserved.