Honda rider Marquez chuan lap thum chauh a la awm tihin Doviozoso chu a lehpel a, Aragon MotoGP-ah pakhatna niin, title lak a hnaih tawh hle.
An tlan tan deuh chauh a, pole position atanga tlan tan Jorge Lorenzo chu kawi hmasa berah a tlan dik lo a, a chesual nghal a. Ducati rider Lorenzo hi a chetsualnaah hian a kezungtang a pelh niin an sawi a, a chetsual zarah hian pahnihna atanga tlan tan Dovizioso chu a hmasa ta ber a ni.
Marc Marquez chu a hmasa ber dawttuah awmin Suzuki rider pahnih Alex Rins leh Andrea Iannone te chuan Marquez hi an um ve leh chhawng a, Alex leh Andrea te hian pathumna dinhmun an inchuh chho a ni.
A hmasa pali te dinhmun hi a danglam ta meuh lo a, intlansiak chanve vel a rawn nih chuan Dovizioso leh Marquez te chu an tlan fal leh zual a. Lap 23 tlan turah lap 14-naah Marquez chuan Dovizioso chu lehpelh tumin a bei a, hlawhtling zeuh mahse a hnuah Dovizioso chuan champion lai chu a lehpel leh tho a.
Tlan hmasa pahnih an inbeih chhoh lai hian Suzuki rider pahnihte chuan an rawn hnaih ve leh ta deuh a, lap 19-ah phei chuan Iannone chuan hma a hruai teuh hle a ni.
Lap 20-ah Marquez chuan Dovizioso a lehpel thei ta lo a, mahse lap 21 an tlan tan deuh chiah a, kawi hmasa berah a lehpel ta nge nge a, a tawp thlengin hma a hruai tluanchhuak ta a ni.
Dovizioso chu pahnihna niin Iannone chu pathumnaah a thleng a, a teammate Alex Rins chu palina a ni a. Iannone zarah hian Suzuki chu tun season chhungin vawi 5 chu podium-ah an lawn ta a ni.
Honda rider Dani Pedrosa chu pangana niin, a hnungah hian Aprilia rider Aleix Espargaro, Ducati rider Danilo Petrucci leh Yamaha rider Valentino Rossi te an awm a ni.
Marquez hian point 72 ngawtin hma a hruai tawh a, Aragon-a pahnihna Dovizioso chu amah hnaih bertu a ni a. Marquez hian point 246 a hmuh laiin Dovizioso hian point 174 a hmu a. Tun season-ah intlansiak vawi 5 chiah a awm tawh dawn a, Marquez hi tu tan pawh um phak a huphurhawm tawh dawn hle a, a zawna MotoGP title vawi 3 lak a hnaih ta hle a ni.
Result:
1 Marc Marquez Honda
2 Andrea Dovizioso Ducati
3 Andrea Iannone Suzuki
4 Alex Rins Suzuki
5 Dani Pedrosa Honda
6 Aleix Espargaro Aprilia
7 Danilo Petrucci Ducati
8 Valentino Rossi Yamaha
9 Jack Miller Ducati
10 Maverick Viñales Yamaha
11 Franco Morbidelli Honda
12 Takaaki Nakagami Honda
13 Bradley Smith KTM
14 Johann Zarco Yamaha
15 Karel Abraham Ducati
16 Scott Redding Aprilia
17 Thomas Luthi Honda
18 Hafizh Syahrin Yamaha
19 Xavier Simeon Ducati
20 Jordi Torres Ducati
Ret Cal Crutchlow Honda
Ret Alvaro Bautista Ducati
Ret Jorge Lorenzo Ducati