Frank Warren chuan kumin April thlaah emaw, May thlaah emaw chuan Deontay Wilder leh Tyson Fury te chu an inhnek nawn leh ngei dawn niin a sawi.

An tum anga thil a kal zel a nih chuan Tyson Fury chuan WBC heavyweight champion Deontay Wilder chu April 27 emaw, May thlaah emaw title a chuhpui leh thei dawn niin promoter Frank Warren chuan a sawi a ni.

Tun kar tirah khan WBC chuan a hmaa Deontay Wilder leh Tyson Fury te inhnek nawn leh tura an tih chungchangah February ni 5 hma ngeia inremna engkim siam turin an lo nawr tawh a. Thla hmasa khan Los Angeles khawpuiah Wilder leh Fury te hi an inhnek a, sawisel hlawh tak maiin an inhnehtawk a. Hetianga mi sawisel hlawh tak result a awm takah chuan hmun danga inhnek nawn leh tura tih an nih phah a ni.

Los Angeles khawpuiah Tyson Fury chu vawi hnih ngawt tlu zawkah tang mahse pundit ho chuan chak zawk turah an dah deuh vek hlawm a. America rama an inhnek avangin judge te chuan Deontay Wilder chu an chhan nia puhna thlengin a ri chhuak a ni.

Warren chuan a tirah America ram pawnah Wilder leh Fury te hi inhnektir an tum tawh thu sawiin, England chu a duhna ber a nih thu a sawi bawk a. Mahse, tun hnaia an han indawr chhoh hnuah America ramah bawk an inhnek leh hmel hle a ni.

“Tunah hian kan inbe chho mek zel a, hun tiam February ni 5 hma ngei hian thutlukna mumal tak kan neih hman ngei ka beisei a. A inhnek tur an inhuam a, Fury tan lek phei chuan Anthony Joshua a hnek aiin pawisa a tam zawk dawn lehnghal a, a tan chuan a hlawk dawn khawp mai,” tiin Frank Warren chuan a sawi a.

“Lehlam lehlamin inhnek ngei hi an duh ve ve avangin thil tih pawh a awlsam phah duak dawn a. America ram ni tawh loin England ramah inhnek thei tawh se tih hi ka duhthusam a ni a, mahse pawl pahnihte inlungrualna a pawimawh a. Ka rin dan chuan April emaw, May emaw hi an inhnek hun tur chu a ni ang,” a ti bawk.