April ni16, 2019 atangin Suzuki Gixxer Pro Volleyball League

02nd April 2019, 07:04PM

April ni 16, 2019 (Thawhlehni) atangin  Hawla Indoor Stadium, Republic Vengthlangah Suzuki Gixxer Pro Volleyball League vawi lina tan a ni ang.

March ni 20 atangin R Dengthuama Indoor Stadium, Mualpuia khelh tura ruahman tawh chu Lok Shaba inthlanpui avangin a hmunah harsatna a awm a, tan hun sawn hlat a ni.

Mizoram Volleyball Association chuan kum khata an programme lian ber Pro Volleyball League neihna tur hall an neih loh avanga harsatna an tawh leh inthlan atan infiamna hall hun rei tak hman thin a ni thu Sports Minister Pu Robert Romawia Royte hnenahan thlen.

Pu Robert Romawia hmalakna avangin Hawla Indoor Stadium chu inthlan atan hman loh tura tih a ni a. Hei vang hian Pro Volleyball khelh hun atan April 16 atanga May 16, 2019 thleng awh turin ruahmanna siam a ni.

Mizoram Volleyball chuan an pawl harsatna bakah, hall/indoor stadium hmang thinte harsatna sutkian saktu Pu Robert Romawia chungah lawmthu an sawi a, Sports Minister a nihna ang taka thalai infiammite innghahnatlak leh pa nih tling tak niin an hria.

Tun tumah hian inelna pathum : Ladies Pro Volleyball League, Junior Pro Volleyball League leh Men Pro Volleyball League a awm dawn a ni.

Junior leh Men Pro Volleyball-ah team pasarih - Anastasia Electric Veng, Chanmari West, Chhinga Veng Spikers, Durtlang North, Hunthar, TNT leh Tuichangral an inel dawn a. Ladies Pro Volleyball-ah team pali - Bungkawn, Kanan, Bethlehem Vengthlang leh Durtlang an inel ve thung ang.

Club tinin an team tichak turin state pawn player tha an la lut thei a, chutih rualin player paruk inkhel zingah state pawn player pakhat bak an tel thei dawn lo a ni.

Team tel zawng zawng tan lawmman pawisa fai pek tur a nih bakah mi mal titha lawmman chi hrang hrang sem a ni ang. Team tinin cheerleader an nei dawn a, a titha ber hnenah lawmman pek a ni bawk ang.

Club tinin Mizo designer thiam takte thui kawr an ha vek dawn a, jersey thui nalh ber hnenah lawmman tha tak pek a ni ang. Hei bakah hian show apiangin man of the match leh fan of the night thlan thin a ni dawn a ni.

Copyright © inkhel.com 2024. All rights reserved.