Real Betis leh Manchester United te chu Antony man chungchangah an inrem ta a, hetih lai hian hlawh chungchangah erawh buaina a la awm tlat mai.

Antony hi United chuan Old Trafford chhuahsan turin an duh a, Real Betis pawhin an lo hawh tawh Antony hi lei an duh bawk a, a thuphungin club pahnih te hi Antony man chungchangah €25m (£21.6m)-in an inrem ta niin The Athletic chuan a tarlang.

Inremnah hian sell-on clause ziah tel a ni dawn bawk a, United hian kum 2023 khan Ajax atangin Antony hi €95m laiin an lei a nih kha, khatah khan add-ons €5m a tel bawk. An leina a to a, tlawm taka hralh chu United hian an hreh ngang mai. Mahse an chhawr duh tawh si loh avangin hralh an tum tha tho chu a ni a.

Betis hian Antony hi €25m (£21.6m)-in lei ta se, hei aia sanga an hralh leh a nih chuan, an hralhna hlep atangin United chuan 50 per cent an la hauh dawn a ni. Entirnan, Barcelona chuan Betis atangin Antony hi €40 million velin lo lei ta se, United chuan an hlep atanga 50 per cent €7.5m an la lalut ve thei dawn tihna a nih chu.

Club pahnih chu an inrem tawh, chutih laiin hlawh chungchangah hian player leh club ten inremna an nei thei dawn nge dawn lo tih erawh a la hriat loh a ni. Antony hian kum 2 chhung atan Old Trafford-ah contract a la nei a, kum khat chhungin £6 million (€6.93m)  lai a hlawh. Betis hian kum khat chhungin €4 million aia sang pek an ngam dawn lo nia report a ni a, indawrna chu kalpui a la ngaih dawn hmel a ni.

Old Trafford-a kum 2 contract la nei Antony hi tun season United game pathumah a la inlan ve lo a, 2024-25 season chawhnu lamah khan Betis-ah loan-in a khel a, game 26 khelin, goal 9 a khung a, assist vawi 5 a nei a ni.