12 Jun 2019 09:38

inkhel

Anthony Joshua hun a tawp tawh: Tyson Fury

Tyson Fury chuan Andy Ruiz Jr hneh loa world heavyweight title hlohtu Anthony Joshua chu a hun a tawp tawh niin a sawi.

IBF, WBA leh IBO champion lo ni tawh thin Tyson Fury chuan anmahni huna Inrinni zanah hian Las Vegas khawpuiah German boxer Tom Schwarz a hmachhawn dawn a. Briton boxer palian deuh hian Anthony Joshua leh Andy Ruiz Jr te inhnek tum khan Joshua chuan ring chhunga awm zui zel a duh lo ni bera a hriat thu a sawi a ni.

Fury chuan, “Anthony Joshua khan inhnek zel kha a duh loh hmel khawp mai a, ring chhunga awm kha a duh lo ni berin ka hria. Mipain thil tih zui zel a duh tawh loh laklawh chuan a hnuah pawh a ti leh zel dawn a, rilru thlak a harsa tawh thin,” a ti.

“Boxer hrang hrangte chuan tun hma atang tawhin hetiang rilru hi an lo pu tawh thin a. Joshua pawh hi an inhnek zan khan a ni ve chiah a, ngai a awh leh hi ka ring tawh lo. A hun a tawp tawh. Boxing khawvela hun rei tak lo awm tawh, trainer lar zawng zawngte chu zawt mah ula, ka ngaihdan hi min tawmpui vek ang,” a ti bawk.

A sawi zelnaah, “Ring chhunga Anthony Joshua a rawn luh khan kha lai hmuna awm kha a duh lo a ni tih ka hmu thiam nghal vek,” a ti.

Mexican-American boxer Ruiz chuan kum 29-a upa Joshua chu June 1 khan New York khawpuia Madison Square Garden-a an inhnekin round 7-naah a hneh a. Joshua promoter Eddie Hearn chuan rematch a awm tur thu sawiin, a hmun tur chu sawi theih la ni lo mahse, an inhnek hun tur chu kumin November emaw, December emaw hi chu a nih tur thu a sawi.

Fury pawh hi WBC champion Deontay Wilder nen rematch nei turin an ti fel tawh a, a hun tur erawh an la sawi chiang lo thung a. Briton hi boxer zingah chuan Wilder hmachhawn tawh zinga chak lo zawka tang lo awm chhun niin, nikum December thlaah khan Los Angeles khawpuiah an inhnehtawk a ni.

Kum 30-a upa Fury hian 2015 ah khan Wladimir Klitschko chu hnehin IBF, WBA leh IBO te a kawl a. A rilru lampanga harsatna leh drug test a paltlang loh avangtein kum hnih leh a chanve chhungin ring chhungah a inlan zui ta lo a, hei vang hian a title chu an hlihsak vek a ni.