Barcelona winger Ansu Fati chuan 2025-26 season pum atan AS Monaco chu loan-in a zawm fel ta. Season liamta khan Fati hian La Liga Champions tan game 11 chiah a khel a, inkhelhna hmun tam zawk chan tumin French club a zawm ta a ni.

Monaco a zawm hma hret hian kum 22 mi hian Barcelona-ah kum 2028 thleng atan contract a ziak hmasa te te a, July ni 1 khan France a pan ta a ni.

Spain international hian Monaco-ah jersey no. 31 a ha dawn. He number hi Barcelona tana bul a tan tirha a jersey number a ni a, Barcelona-a a jersey no. 10 chu kalsanin, Lamine Yamal chuan Messi-a number hi a rochun dawn nia report a ni.

Ansu Fati hi Barcelona academy chhuak a ni a, Europe-a player naupang hmabak eng tak niin, Messi aiawh zo tur anga sawi hial a ni. Messi-a'n PSG a pan khan Barcelona jersey no. 10 chu Fati hian a rochun chhunzawm ta bawk.

Hetih lai hian a vanduai a, a inhliam nasa em em. Barcelona tan game 123 atangin goal 29 a khung a, assist vawi 8 a nei. 2023-24 season khan English club Brighton-ah loan-in a khel a, hetah pawh a inhliam nasa a, a dam chhunah pawh inkhelhna hmun a chang hleithei lo, Premier League-ah vawi 3 chian inkhelh bul a tan nghe nghe.

2024-25 pre-season an neih khan a inhliam leh a, nikum November thla khan a inhliam leh bawk. Heng te a nih avang hian season liamta khan Barcelona tan a inlan tam thei lo a, a dam that hnuah pawh ngai a awh hleithei tawh lo. Inkhelhna hmun a chan tam theihna tur Monaco a zawm ta a ni.

Monaco hian free agent Paul Pogba chu an la lut a, Bayern Munich atangin free transfer-in Eric Dier an la lut bawk a. Tunah loan-in Ansu Fati an la lut leh ta bawk a ni.