Mizo Chelsea Supporters' Club (MCSC) chuan kumtina an lo tih tawh ṭhin angin Pathianni (9/12/2018) chawhnu lam khan Charity Ride neiin TNT an tlawh a ṭanpuina tam tham tak an hlan.

Mizo Chelsea Fans (MCF) ti a hriatlar MCSC hian Chelsea Football Club ringawt an atchilh lo va, midang tana malsawmna nih tumin Chelsea hming hian vawi tam tak thil ṭha an lo ti tawh ṭhin.

Tun ṭumah hian an khawnkhawm aṭanga an hmuh zawng zawng Rs. 1,04,095 chu TNT hnenah hian an hlan a, pawisa fai bakah hian Buhfai Bag 10, Neutrela Bag 2 leh Thawmhnaw Bag 10 an hlan tel bawk.

Chelsea hnuaia Gold Tier ni pha tawh MCSC hian ṭum thum lai chu TNT hi an tlawh ta a, Hermon Childrens Home, Durtlang pawh tlawh tawhin a mamawhte hman tur Thisen Pek (Blood Donation) pawh ṭum li an huaihawt tawh.

Chelsea fansclub hrang hrang zinga lian ber MCSC hian November ni 23 khan Ambience Mall, Gurgaon-ah Didier Drogba hmuin Khumbeu, Ipte chei leh MCSC 2019 Calendar an hlan a, Chelsea tana goal tam tak lo khung tawhtu Drogba hian inkhelh chawlhsan tawh mahse Chelsea leh Yokohama tan a thawkzui zel a hmun hrang hrangah a zin kual.