Jurgen Klopp chuan Anfield-a contract a hman zawh hunah chuan an ram lama kal a tum thu a sawi.

Liverpool manager Jurgen Klopp chuan Anfield-ah 2024 nipui thleng contract a nei a, a contract hi hman zawh a tum thu sawiin, he mi hnuah hi chuan an ram lama kir a tum thu a sawi chhuak.

German coach hian December 2019 ah khan contract a ziak thar a, thuthlung a ziah thar hnuah hian Liverpool chu Premier League title a lakpui zui a. Kum 30 zet an lo nghahfak tawh league title chu Merseyside lamah a la lut a ni.

A hma deuhin Klopp hian Liverpool chu Europe khawmualpui lamah hlawntlinna hmel a lo hmuhpui tawh bawk a, thla 13 chhung chauhin Premier League title bakah UEFA Champions League leh FIFA Club World Cup trophy te a lakpui thei a ni.

Klopp chuan, “Ka contract neih lai hi ka hmang zo ang a, England rama ka awm chen tur hi min zawt thin a, Liverpool-ah hian kum li chu ka la awm dawn a ni,” a ti.

“Ka contract ka hman zawh hnuah hian Germany lamah ka kir ang a, chu mi hunah chuan engtin nge ka awm dawn tih chu ka la sawi thei lo a, khawsa zui tur chuan a ni ngei ang a. Mainz velah pawh ka awm mai thei,” a ti bawk.

Anfield a chhuahsan hnuah hian eng thil pawh thleng thei a nih thu Klopp chuan sawiin, eng club emaw ber pawh enkawl thei a nih rualin, eng ram team emaw pawh a enkawl theih thu a sawi tel a. Chu mi piah lamah kum khat chhung chu engmah ti miah loin a awm thei niin a sawi tel bawk a ni.