Manchester City manager Pep Guardiola chuan Anfield-a Premier League hmahruaitu Liverpool an tlawh hunah rinkai lo zawk (underdog) an nih dawn loh thu a sawi chhuak.

City hi tunah rih chuan Premier League table-ah palinaah an awm meka, Liverpool nen hian point rukin an inthlau. City hian zanin dar 10-ah Liverpool an tlawh dawna, he inkhelah City hi an chak chuan pahnihnaah an chho leh anga, Liverpool nen an inkarah point 3 chiah a awm tawh dawn.

City hi an chak loh erawh chuan an chungah Cheslea, Leicester leh Liverpool-te an awm dawna, Liverpool chuan point 9 laiin an tlansan bawk dawn avangin inkhel pawimawh tak a ni dawna, a hmuhnawm hle tura ngaih a ni bawk.

City hi tun season-ah Liverpool aiin an che chhe hret zawka, khelh 11-ah vawi hnih tlawm tawhin, vawi khat an tumpuite an inhnehtawkpui tawha, vawi 8 hnehna an chang tawh. Liverpool erawh an che tha hle a, vawi khat an tumpui an inhnehtawkpui tih loh chu tun season-ah point hloh an la nei lo.

Premier League champion lai City hi Anfield-ah an chak mawh hle a, Anfield-a an chak hnuhnun ber chu kum 2003 daih tawh kha niin, kum 1981 Boxing Day hnuah vawi khat bak Anfield-ah an la chak lo tihna a ni a, zanin inkhel turah pawh ‘underdog’ angin an kal lo thei lo a tih theih awm e.

Pep Guardiola chuan, “Kan club mi leh sa ni lo te leh media-te ho hian ‘underdog’ zawk anga min sawi an tum a, mahse underdog hi ka nih ngai ka la hre lo. Liverpool hian point rukin hma chu an hruai chiang maia, tun season-ah an khel tha thin em em a, mahse chak lo tura inngaiin Anfield hi ka pan dawn reng reng lo.

“Chak lo tura inngaih hi ka career-ah ka la nei ngai lova, eng emaw tak kan thlen tir thei tih hi ka ringa, chak theihna chance kan nei tih pawh ka hria. Liverpool hi kan hneh dawn chuan kan khelh that ber zan a nih a ngai tih kan inhria a, a te ber thlengin kan chip peih a ngai. Kan chak thei tih hi kan inrin a ngai a, eng nge thleng tur chu kan hre zel mai dawn a ni,” a ti.