August 24 (Inrinni) zan dar 9:50 ah Premier League inkhel hmuhnawm tak a awm dawn a, Liverpool leh Arsenal te chu Anfield-ah an inkhel dawn a ni.

Nipui transfer window inhawn chhungin team pahnihte hi an chet dan a inang lo hle a, European champion Liverpool chuan player an lei thar meuh lo a, an squad pangngai an ring zui zel dawn a. Hetih lai hian Arsenal ve thung chuan player an lei thar nual mai a, Nicolas Pepe, Kieran Tierney leh David Luiz te chu an lak thar langsar zual an ni.

Tun season bul tannaah anni team pahnihte chiah hi vawi hnih khelha chak thei ve ve awm chhun an la ni a. Premier League club zinga 100% record nei mek pahnihte hian Anfield-ah record an neih chhunzawm zel dawn nge dawn lo hriat a chakawm tawh hle.

Anfield-ah hian
Arsenal hi Anfield-ah an che fuh thei meuh tawh rih lo a, Premier League game 6 chhung chu Liverpool khelmualah hian chak hmel an hmu thei tawh lo a. Helai hmunah hian inelna hrang hrangah vawi 13 chu an tlawm tawh a, hei aia an tlawm hnemna awm chhun chu Manchester United khelmual Old Trafford-ah a ni.

Match 6 an chak lohah hian Arsenal chuan goal 22 teh meuh mai an chhuah tawh a, a lo berah game tinah goal 2 tal chu an chhuah ziah ang a ni.

Liverpool chuan an khelmualah point an hloh tam lo hle a, match 41 khelhah an la tlawm miah lo a. October 2008 a tlawm miah loa match 86 chhung kal tluang Chelsea chiah an aia mahni khelmuala che tha tluang an awm a ni.

Premier League club lian paruk zingah Liverpool hi an che fuh thei viau mai a, Anfield bikah chuan game 18 chhung club chungnung ho lakah hian an tlawm tawh lo a, heng zingah hian vawi 10 chu an chak a ni.

Season liam taah khan Liverpool chuan Anfield-ah Arsenal hi 5-1 ngawtin an hneh a, hetiang result hi thlentir leh theih ngei an tum viau dawn a ni.

Mohamed Salah vs Nicolas Pepe
Season hman zawh takah 5-1 ngawta Arsenal an lo hneh tum khan Mohamed Salah chuan goal a thun a, Inrinniah pawh thun leh theih ngei a tum dawn a. Arsenal tan Nicolas Pepe chuan to taka an lei man phu turin boruak lian tak neih ngei a tum a rinawm.

Mohamed Salah chuan season hmasaah khan goal 15 thunin, mi goal thun tur vawi 11 a siamsak a, a belh khawm hian 26 niin, minute 95.6 zelah goal khat thun ziah ang a ni.

Nicolas Pepe chuan goal 22 a thun a, mi goal thun tur vawi 11 a siamsak bawk a, a vaia belh khawm hi 33 niin, minute 100.8 zelah goal thun ziah anga chhut a ni.

Pepe hian Salah ai chuan a dribble hnem daih zawk a, vawi 213 zet a dribble laiin Egyptian striker hian vawi 70 chiah a dribble thung a. Pepe lakah foul pawh a tam zawk daih a, amah vangin lehlam pawl chu vawi 108 an foul laiin, Salah vang hian lehlam pawl chu vawi 26 chauh an foul ve thung a ni.

Tun hnaiah
An khelmuala an chet that laklawh em avangin Arsenal tan chuan Liverpool chu an hlauhawm tham viau dawn a. Anfield-ah chauh lo pawh Reds hi an kal tluang viau bawk a, Premier League bikah a zawnin vawi 11 chu an chak mek a. Arsenal hi an hneh thei a nih phei chuan a zawnin Premier League game 12 chhung an chak ang a, an club record ding lai an nihrual thei ang.

Premier League bika Liverpool-in point an hloh hnuhnun ber chu kumin March thlaa Everton nen goal inpe loa an inhnehtawk tum kha niin, hemi hma kara Manchester United nen 0-0 bawka an inhnehtawk nen khan league game 32 chhunga goal an thun loh awm chhun an ni.

Arsenal chu Premier League game thum chhung a zawnin an chak mek a, kum khat dawn chu a zawnin vawi li chak hmel an hmu thei tawh lo a, tun hi vawi li chak theihna hun tha an neih chu a ni. Anfield-ah hian Arsenal hi an chak thei a nih chuan 2004-05 hnua Premier League season bul tannaa a zawna game thum an chak leh theih hmasak ber a ni ang.

Hman atangin
Liverpool leh Arsenal inkhelah hian goal a lut hnem tawh hle a, goal 155 zet chu a lut tawh a. Salah bakah Roberto Firmino chu goal thun thei ngei tura beiseiawm berte zinga mi a ni a, Liverpool tlar hmaa khelte chuan goal an thun ngei a rinawm viau a ni.

Arsenal tlar hma lampang chu beiseiawm ve viau tho mahse Pierre-Emerick Aubameyang chu Premier League club chungnung ho laka a chet fuh theih loh thin avangin a dinhmun tur rin thiam a harsa angreng hle a. Aubameyang hian club chungnung ho laka game 13 khelhah goal 3 chiah a thun thei a. Club dangte lakah chuan a che tha viau a, game 38 khelhah goal 31 a thun thei thung.

Anni pahnih inkhel turah hian Liverpool chu chak tura rin kai zawk an ni chiang a, season hmasaa Premier League-a pahnihna ni thei an nih mai piah lamah, Arsenal lakah hian game 8 chhung chu an la tlawm miah lo a. February 2000 hnua an chet fuh leh ber tum niin, Jurgen Klopp chu Gunners lakah hian a la tlawm miah lo a ni.