25 Aug 2019 12:46

bakteaJr.

Mizo tlangval

​Anfield-ah Liverpool-in Arsenal an hneh

Premier League inkhelah Liverpool chuan Anfield-ah Arsenal an lo mikhuala, Liverpool hi 3-1 a chakin point thum hlu tak an hlawhchhuak.

Liverpool tan hian Aigupta mi Mohamed Salah chuan goal hnih khungin, Joel Matip chuan goal khat a khung bawka, Arsenal tan Uruguayan midfielder Lucas Torreira chuan goal a khung ve bawk.

Khelh thuma la chak vek Liverpool chu table lerah an awm a, point kua an hlawhchhuak tawh. Arsenal hian khelh thumah point ruk hlawhchhuak tawhin pahnihnaah an awm mek ve thung.

Liverpool 3-1 Arsenal

(Matip 41’, Salah 49’pen, 58’) (Torreira 85’)

Player Ratings

LIVERPOOL: Adrian 6, Alexander-Arnold 8, Matip 9, Van Dijk 7, Robertson 7, Fabinho 7, Wijnaldum 7, Henderson 7, Salah 9, Firmino 7, Mane 7. Subs: Milner 6, Oxlade-Chamberlain6, Lallana n/a.

ARSENAL: Leno 6, Maitland-Niles 6, Luiz 5, Sokratis 7, Monreal 6, Guendouzi 7, Xhaka 6, Willock 6, Ceballos 5, Pepe 8, Aubameyang 7. Subs: Torreira 7, Lacazette 6, Mkhitaryan n/a.

Match Report

Inkhel an tana , Liverpool an hlauhawm nghal. Liverpool hlauhawm zawk mahse chance tha tak erawh Arsenal-in an nei hmasaa, minute sawm khelh a nihin Pepe chu through ball pek niin, Van Dijk chuan a tlan khalha, Van Dijk-a’n ball a clear hma hian Liverpool keeper Adrian chu rawn chhuakin ball a rawn tlawh sawn, Aubameyang-a’n ball a chang zuia, Liverpool goal a ruak; Aubameyang hian a kangin Liverpool goal ruakah ball pet luh tum mahse a zawn lo hreta, Liverpool an vannei hle.

Arsenal hian chance tha tak an nei zui leha, anmahni half atangin David Luiz chuan Liverpool box-ah ball a vawrh phei, box chhungah hian Pepe chuan lo changin goal-ah ball a pet a, Adrian chuan a lo save tha hle. Chance tha tak ni mahse Pepe hian ball a lak hian a ban a fuh chiang hle a, goal ta pawh nise VAR-in a sut leh ngei ang.

20mins khelh a nihin Ceballos chuan a pass sual a, mual veilam sir atangin an box chhungah ball a pe phei, Mane chuan a lo chang hlauha, Mane hian goal-ah shoot zui mahse harsa lutuk lovin Leno-a’n a lo save. Darkar chanve khelh a ni a, Pepe chu Liverpool box hma chiahah ball pek a ni, Pepe hian a ke hman thiam lam, a ke veilamin a shoot-a, pet chhe lo mahse goal a zawn tawk lo.

Darkar chanve chuang hret khelh a ni a, Henderson-a tihsualah Pepe chuan ball changin a khalha, a hmaa defender awmchhun bumin ball a khalh zel; goal-ah ball a pet, mahse a ke dinglam hman thiam loh a tuar a tih theiha, rem leh rem lovin a ke dinglamin a shoot, harsa awm lovin Adrian chuan a lo save.

Half time hma deuh lawkin Liverpool-in hma an hruai a, corner atanga ball vawrh luh chuan Matip chuan goal-ah lo tauh lutin Liverpool hma a hruaipuia, first half hi 1-0 in a tawp.

Second half tan a ni a, minute tam khelh a nih hma in Salah chu Arsenal defender thar David Luiz chuan box chhungah a pawt thlu a, Liverpool-in penalty an hlawhchhuak; penalty spot atang hian Egyptian goal thun khawl Salah chuan pet goal-ah Liverpool in si hnih faiin hma an hruai.

Liverpool-in an goal hnih an khung atanga minute sawm vel a liamin, an goal thumna an khung leha, Salah chuan Luiz bum tlangin goal lamah ball a khalha, Leno nen inhmachhawnin, Salah hian a pet goal zuia, Liverpool tan point thum a chiang thawkhat a ni ber.

Liverpool hi si thum faiin an chak tura ngaih a nih hnuah Arsenal chuan hun tawp hma deuhin goal an khung ve hrama, bench atang rawn lut Torreira chuan Aubameyang-a ball pek chu goal-ah lo chan tirin Gunners tan goal khat a khung. Inkhel hi 3-1 in a tawpa, season liamtaa goal chhuah tlem ber Liverpool chuan tun season kal mekah clean-sheet an la nei lo a ni.