14 Apr 2019 09:30

inkhel

​Anfield-ah Chelsea-in Liverpool beiseina tih tawp an tum dawn

Zanin (14/4/19) hian Premier League inkhel pawimawh tak a awm dawn a, Champion tum mek Liverpool chuan season thara Champions League khelh ngei tum Chelsea chu Anfield-ah an lo mikhual dawn.

Team hnihte hian khelh nga bak khelh tur an nei tawh lova, tawlhthluk a thiang tawh lo. An tawlhthlu ve ve anga point an insem dawn nge pakhat zawk chauh an tawlhthlu dawn tih erawh zaninah kan hre dawn.

Liverpool hian khelh 33 khel thawin league hma an hruai mek a, an hnuai chiaha awm Manchester City aiin point hnihin an sang zawk a mahse khelh khatin an khel tam zawk. Chelsea hian khelh 33-ah point 66 hlawhchhuak tawhin palinaah an awm mek a, an chung chiaha awm Tottenham aiin point khatin an hniam.

An Premier League game hnuhnung pathumah team hnihte hi an chak vek ve ve a, an kal tluan dun em avangin inkhel hmuhnawm tak; Premier League inkhel dik tak kan hmuh ngei pawh a beiseiawm hle.

Liverpool hian kum 29 chhung ngawt English top-flight league title an la tawh lova, tun season-ah lak an tum hle a, tun season anga chance tha hi an hmu tawh mai mai dawn lo. Kum 2014 pawh khan Liverpool hian champion an inbeisei hle a, hemi tum hian Chelsea chuan an beiseina titawpin an hneha, Steven Gerrard-a tawlhthluk tum kha a ni.

Chelsea chuan tun season-ah pawh Liverpool beiseina tihtawp sak leh ngei an tum hle dawn a, Liverpool chuan phuba lak ngei an duh dawn a, Chelsea lakah an beiseina tihtawp leh chu engti kawng pawha pumpelh an tum dawn.

Tun kar liamta mai khan Liverpool chuan Champions League Quarter-final first leg-ah Porto an hneha, Chelsea hian Europa League Quarter-final ah Slavia Praha an hneh ve bawk.

Zaninah Liverpool tan khel thei lo tur langsar em em an awm lova, Adam Lallana pawh hliam tenau avanga game hnih a awl hnuah Chelsea laka inlan thei tura ngaih a ni a, defender Joe Gomez pawh hun rei tak a inhliam hnuah a dam leh tan tawh a, bench lamah tal a hmel kan hmuh a beiseiawm.

Chelsea tan pawh khel thei lo tur langsar em em an awm hran lova, manager Maurizio Sarri chuan Slavia Praha laka a hahchawlhtir Eden Hazard chu inkhel bul tan ngei tura beisei a ni a, Callum Hudson-Odoi pawh bench lamah tal kan hmuh leh ngei a rinawm a, Emerson a la dam chian loh avangin a khelh theih a rinawm loh thung.

Liverpool hian Premier League inkhel bikah Anfield-a Chelsea an mikhual hnuhnung parukah hnehna vawi khat mah an chang lova, Chelsea aia home-a hneh loh rei hi an la nei lo.

Predicted line-up:

Liverpool- Alisson; Alexander-Arnold, Lovren, Van Dijk, Robertson; Milner, Henderson, Wijnaldum; Salah, Firmino, Mané.

Chelsea- Arrizabalaga, Azpilicueta, Luiz, Rudiger, Alonso, Jorginho, Kante, Kovacic, Hazard, Willian, Higuain.