Liverpool left-back Andy Robertson chu a dar zai a ni a, Liverpool manager Jurgen Klopp chuan an defender hi tluang taka zai a nih thu a sawi a, a inkhelh leh theih hun tur erawh a sawi thei lo.

A ram Scotland tana a fehchhuahnaah Robertson hi a inhliam a, Euro 2024 qualifying inkhela Scotland leh Spain an inhmachhawn tumin Spain goalkeeper Unai Simon nena an insutnaah Robertson hi a inhliam.

Liverpool boss Klopp chuan Robertson-a chungchang zawhna chhangin, “Tluang taka zai a ni a, eng anga rei nge a chawlh a ngaih dawn kan la hre lova, mahse a step hmasa ber chu kan zo fel phawt,” tiin a sawi.

Tun season-ah Scotland captain hian Liverpool tan Premier League-ah game 8 khel tawhin goal 1 a khung tawh a, kar liamta khan Merseyside derby-ah a inlan thei tawh lova, a aiah Greek left-back Kostas Tsimikas a khel.

Robertson hi thla 3 tal chawl tura ngaih a ni a, kumin chhunga a inlan theih tawh dawn loh avangin Premier League match-ah Manchester City, Manchester United leh Arsenal te a hmachhawn thei dawn lo.

Kum 29 mi hian kum 2017 khan Hull City atangin Liverpool hi a pan a, a man kha  £8million vel nia report a ni. Liverpool tan game 275 chuang a khel tawh a, mamawh hunlai takin Liverpool tan a inlan thei dawn ta lo a ni.