Manchester United leh Cameroon goalkeeper Andre Onana chu, Cameroon tana a fehchhuahnaah a inhliam a, a inhliam serious em tih a la hriat loh.

Kum 27 mi hi a hliam nat dan endik a nih theih nan Manchester United-ah a kir dawn a, Zirtawpnia Mauritius a hmachhawnnaah Onana hi a inhiam a ni.

Mauritius lakah hian Onana hi Cameroon tan si ban nghakin, save a siamna lamah a inhliam a, 81mins-a lak chhuah niin, Thawhlehnia Cameroon-in Libya an hmachhawn hunah pawh a inlan thei dawn lo.

Cameroon lam hian Onana inhliam dan hi chiang takin an ziak lova, United-ah endik a nih hnuah chiang zawkin Onana inhliam dan hi kan hre thei tura ngaih a ni.

Kumin July thla khan United hian David de Gea thlak turin Onana hi Inter Milan atangin an lei a, a manah pound maktaduai 47.2 sengin, tun season-a United in competition hrang hranga game 18 an khelh tawhah a la inlan vek.

International break zawhah United hian Premier League inkhelah Everton an tlawh dawn a, ni thum hnuah Champions League group stage inkhelah Galatasaray an tlawh leh dawn bawk a, heng inkhelah hian Onana hian si ban a nghak dawn em tih a la sawi theih loh.

United hian player inhliam an ngah sa a, Lisandro Martinez, Casemiro, Christian Eriksen, Luke Shaw, Jonny Evans, Tyrell Malacia, Aaron Wan-Bissaka leh Rasmus Hojlund te chu an inhliam mek hlawm a ni.