Manchester City captain Vincent Kompany chuan tun season zawh rualin Etihad Stadium-a a contract a hmang zo dawn a, City a chhuahsan dawn.

Kompany hian a lo chawr chhuahna Belgian club Anderlecht a zawm dawn a, Anderlecht-ah hian player ni chungin manager hna a thawk bawk dawn a, player-manager a ni ang.

Kompany hian kum 2003 khan football-ah a professional career a tan a, tunah hian club pathum tan bak a la khel lo. Kompany hi Anderlecht academy chhuak a ni a, kum 2003 atanga kum 2006 thleng Anderlecht senior team tan a khel.

Kum 2006 khan German club Hamburger SV a zawm a, kum 2008 khan Manchester City chuan leiin, a hlawhtlin zui zia chu sawi tam a ngai lo. City-ah hian kum 11 chhung the meuh hun hmangin Premier League title pali bakah FA Cup pahnih leh League Cup pali-te a chawi hman a ni.

Thla hmasa mai khan Kompany hian kum 33 a tlinga, upa tan tawh mahse upa lutuk a la ni hran lova, beisei loh takin player ni chungin manager hna a thawk dawn a, a hmangaih hmasa Anderlecht-ah a kum thum daih contract a ziak ta a ni.

Manchester City chuan an chanchina an chet ropui ber tum tun season khan an tawng a, England –a trophy awm zawng zawng an hui vek. Kompany hi Premier League title an lakna kawngah a la thawhhlawk hle a, kum dang angin khel tam lo mahse a khel tam thawkhat viau tho.

City tan Kompany hian game 360 lai a khel hmana, tun inrinni liamta mai khan FA Cup-ah City champion puiin final-ah Watford chu 6-0 laiin an hneh a ni.